Inhlanganiso ekhankasela ukulondolozwa kwamalungelo entathelizindaba, iMisa, ngoMvulo ithumele amazwi enduduzo emulini yowake wakhokhela linhlanganiso uMnu Thomas Deve, yena obhubhele eHarare ngeSonto.
UMnu Deve ubeleminyaka yokuzalwa engamatshumi amahlanu lambili njalo utshiye umkakhe labantwana abane. Imuli yakhe ithi ubulawe yikuma kwenhliziyo engagulanga.
UDeve ubeyintathelizindaba eludumo njalo wake wasebenzela amaphephandaba egoqela iZimbabwe Mirror le Daily News.
Ekufeni kwakhe ubesebenzela inhlanganiso ethiwa yiDeep Roots Foundation. Umuyi ubengumuntu njalo obesaziwa ngokukhankasela amalungelo oluntu kanye lokuqedwa kobuyanga.
UDeve uzabekwa kusasa emathuneni eWarren Hills eHarare. Umqondisi weMisa uMnu Nhlanhla Ngwenya utshele iStudio 7 ukuthi eleZimbabwe lilahlekelwe kakhulu.