Abomdeni wentathelizindaba yezemidlalo elodumo uTendai Ndemera, obhubhe emadabukakusa ngoLwesithathu, babika ukuba uzobekwa emathuneni aweZororo Memorial Park, eHarare ngoLwesihlanu ngelanga leKhisimusi.
UNdemera, olembali yokusebenza njengentathelizindaba yezemidlalo kumankampani ezindaba atshiyeneyo agoqela kuphephandaba leHerald, Sunday Mail, Daily Gazette kanye leStudio 7, ubhubhe eseleminyaka engamatshumi ayisithupha lambili yokuzalwa njalo utshiye abantwana abayisikhombisa labazukulu abayisithupha.
Asebenze labo ekuthapheni indaba zemidlalo abanjengo Charles Mabika, Stan Katsande, Colin Matiza, Tawanda Tafirenyika labanye, bamchaze njengomuntu owayesebenzeka lula laye ejabulela ukuhlekisa abanye emsebenzini langekhaya.
Abantu babuthene kukheli ethi number 4 Cannan Mhlanga Ave, emzini weNational Mbare, eHarare.
Umnawakhe uMnu. Chamunorwa Thomas Ndemera, onguye okhuluma emele imuli, utshele iStudio 7 ukuthi amalungiselelo wonke womngcwabo asenziwe ukuze ayebekwa eZororo Memorial Park.