Intathelizindaba ezimbili ezephephandaba le Newsday ebezivalelwe ngemva kokubotshwa ngoLwesine zikhululwe ngoLwesihlanu ngemva kokuvunyelwa ukuhlawula imali yesibambiso, eye bail engamadola angamakhulu amabili- $200 ngamunye.
UNqaba Matshazi lo Xolisani Ncube bavalelwe ngamapholisa besetheswa icala lokubhala amanga edabeni lwabo lapho ababike ukuthi amapholisa ensitha awe CIO bathole iholo labo lebonus kodwa ezinye izisebenzi kungakhanyi ukuthi lizolithola na? Eyesithathu intathelizindaba uSifikile Thabete uhle wathiwa akala cala wahle wakhululwa engahlawuliswanga isibambiso.
Igqwetha lalezi ntatheli, uMnu. Taona Nyamakura utshele umsakazo weStudio Seven ukuthi bazakhweza loludaba emthethwandaba waphezulu owesisekelo sombuso, iConstituional Court ngoba umthetho osetshenzisiweyo ukuzibopha lezintathelizindaba wephula ilulngelo lazo. Zizaphindela njalo emthethwandaba mhlaka 27 wayonalinyanga kaZibandlela 2016.
Unobhala jikelele wenhlanganiso ebona ngokulondolozwa kwelungelo lentathelizindaba eye Zimbabwe Union Of Journalists, uMnu. Foster Dongozi utshele umsakazo weStudio Seven ukuthi bona njengenhlanganiso bayasisola isenzo sikahulumende sokubopha zonke intathelizindaba lezi.
"Zinengi indlela ezingalungisisa ingxabano phakathi kukahulumende lentathelizindaba nxa elinye icele libone ukuthi liphanjaniselwe kulokutshona abantu besenzelana inhliziyo embi bevalelana esitokisini. Nxa uhulumende ebona inthathelizindaba zimkhubile akudingi ukuthi aze azivalele, udaba lusiwa emithethwandaba eyiyo ezoxazulula udaba itho lokuthi umthetho uyabe wephulwe ngaphiIntathe." kutsho uDongozi.
Uqhubeke ethi zona intathelizindaba zilawo amadale awo okuqondisa ukusebenza kwazo lawo angasetshenziswa ukujezisa lezo eziyabe ziphazamisa isimilo senthathelizindaba zonke elizweni ngakhoke uthi bazaqhubeka bekhankasela ukuguqulwa komthetho uhulumende awusebenzisa ukubopha mahlayana intathelizindaba ngendlela eziloba ngayo njalo kabasoze bayekethise lezo ziqondiso zize zesulwe.
