Ukususwa kukamnumnzana Jonathan Moyo esikhundleni sokuba ngumphathintambo wogatsha lokwethulwa kwezemibiko esiyakuba ngumphathintambo wogatsha lwezemfundo ephezulu, sekunconywe kakhulu zintatheli zeZimbabwe ezinengi ezikwele South Africa.
Inengi lalezi intatheli zitshele iStudio 7 ukuthi mkhulu kakhulu umonakalo osudalwe nguMoyo kwezokwethulwa kwemibiko elizweni jikelele.
Intathelizindaba lezi zithi ukungena kukamnumnzana Jonathan Moyo esikhundleni sokuba ngumphathintambo wezokwethulwa kwemibiko yikho okwaqeda du ukunambitha kwezindaba lezokusakaza eZimbabwe. Umnumnzana Moyo ukhethwe ukuba ngumphathintambo walolugatsha okokuqala ngo 2000. Ngo 2001 wethula imithetho egoqela owe Zimbabwe Broadcasting Corporation Act, abanengi abathi yiwo owatshiya umsakazo weZBC usulele ngogedla.
Ngo 2002 wengeza eminye efana lowe Access to Information and Protection of Privacy Act, abanengi abathi yiwo owaquma intathelizindaba ezinengi imilomo, inengi lazo latshiya imisebenzi labaleka elizweni.
Ngenxa yale imithetho, kwaqala ukubotshwa lokuhlukunyezwa kwentatheli zindaba ezisebenzela amankampani ezindaba azimeleyo, kwafuneka amaqubaquba email ukuze intatheli ezivela phandle kwelizwe zisebenze yaphinde futhi yabangela ukuvalwa kwamanye amaphephandaba lokukwenqatshelwa kwamankampani abezindaba avela kwamanye amazwe.
Intatheli yeZimbabwe esebenza izimele kweleSouth Africa uNdumiso Mlilo uthi uMoyo utshiye edale umonakalo omkhulu kwezokwethulwa kwemibiko elizweni.
UMlilo uthi okumzwisa ubuhlungu yikuthi ingxabangxoza etshiywe nguMoyo emsakazweni kaZulu oweZBC isize yafika esigabeni sokuthi kayisalungiseki.
Kodwake enye intatheli yeZimbabwe ezimeleyo kweleSouth Africa uMxolisi Ncube owakhe wayifunda ivaliwe sekuthiwa nguye UBaba Jukwa otshukela injobo zeziphathamandla ebandla, uthi usizi yikuthi ukususwa kukaMoyo kulolugatsha kakusoke kulethe inguquko ekhangelelwe zintatheli.
UMxolisi uthi njengoba ukukhitshwa kukaMoyo kulolugatsha kungenxa yombango wamandla ombuso ebandleni leZanu PF, kungenzeka abamkhiphileyo badale umonakalo owedlula owakhe kwezokwethulwa kwezindaba.
Loba kunjalo ezinye intathelizindaba ezifana loMkhululi Chimoi zithi aziyiboni into embi eyenziwa nguMoyo kulesisikhundla. UMkhululi uthi kusobala ukuthi isikhundla sakhe kasiphiwanga umphathintambo okiso ngokugcweleyo ngenxa yokuthi bakhona abafuna ukusebenzisa lolugatsha ekufezeni injongo zabo.
Lezi intatheli zithi ezikufisayo yikuthi ngelinye ilanga eZimbabwe lakho intatheli zisebenze zikhululekile njengalapha kweleSouth Africa ukuze lazo ngeminye iminyaka zibuyele ziyesebenzela ekhaya.