Inkulungwane lenkulungwane zabantu zibuthene enkundleni yeWhite City Stadium koBulawayo uzulu ehlonipha imisebenzi yabezomvikela.
Esethula umbiko wokunanza leli langa umphathintambo wakoBulawayo, uNkosikazi Judith Ncube ubonge ukuthula okukhona elizweni kanye lemisebenzi eyenziwa ngabebutho eZimbabwe lakwamanye amazwe.
''Ilanga leli liqakathekile kakhulu njalo lisenza siqedisise imisebenzi yebutho ezweni ngoba izikhathi ezinengi sasithi ngelokuvikela ilizwe kodwa bayathuthukisa izabelo njalo.''
ILunga ledale leCentral Committee yeZANU-PF, uNkosikazi Molly Mpofu uthe abantu kumele bahloniphe abebutho njalo bengaqanjelwa amanga kumbe ukusetshenziswa kumikhuba yenkohlakalo.
''Ilanga lalamuhla liqakatheke kakhulu njengabantu beZimbabwe amabutho ethu asebenza kakhulu ukuvikela lizwe njalo kuhle bathatha ezinyaweni zethu. Langamasotsha abafundela ukuvikela isiszwe asifuni abantu abalisebenzisa ize kumbe ukubaqambela amanga.Silapha ngenxayabo, akulanto engenzakala kuleli silamajaha lezintombi lezi. Sibona uMongameli Mnangawa ngokusipha ithuba elifana laleli ukuba sihlangane lebutho lesizwe.''
Owaphatheka ekubumbeni ibutho lakuqala eZimbabwe, uRtd. Col Tshinga Dube uthi lelilanga liqakathekile ngoba kunanzwa ibutho elasungulwa ngo1980 ngesikhathi sokuthola uzibuse.
''Lililanga elikhulu emasotsheni iZimbabwe Defence Forces Day eZimbabwe elihlanganisa amasotsha onke singathi yiBirthday yebutho betshengisa lobungcitshi babo njalo betshingisa ukubunjwa kweZDF ngokuphela kwempi okwahlanganisa amabutho eviyo leZPRA, iRhodesian Forces leZNLA.''
Abanye abaze emkhosini lo baphe inhlonipho enkulu kubutho leZimbabwe bethi liphethe kahle umsebenzi. Omunye wabo nguMnu. Absalom Sikhosana isakhamuzi sakoBulawayo.
''Lilanga eliqakatheke okumangalisayo ngoba kulapha esihlonipha khona ukubakhona kwamajaha lezintombi ezisipha ukuthula elizweni ezenza silale ubuthongo behle ngoba sisazi ukuthi sivikelekile loba kukhona abadinga ukungahlaliseki elizweni lakithi siyethemba ukuthi ngobukhona babo bazasiphathisa ilizwe lethu liqhubeke lilokuthula sihlanganisa amakhanda sisebenzele ukuthuthukisa ilizwe lakithi njengemuli yeZimbabwe besigcinile sibeleqiniso ukuthi akukho okungasiphambanisa ilizwe licine selingamanga kuhle ngakho lelilanga liqakathekile okumanalisayo ngokunanza umsebenzi omkhulu okumangalisayo ophethwe ngamajaha lamantombazana akubutho.''
Owake waba yisiphathamandla sebutho uRet. Col. Thomas Ngwenya owangena kubutho evela empini yenkululeko laye ubuke okwenziwa ngabebutho.
''Thina njengabantu bokuqala bokulwela inkululeko, abokuqala singamaofficers eZNA siyalamukela ilanga leli siyakubuka konke okwenzakalayo okunengi singazake sikukhulume kuzakhulunywa ngabanye abangabe bayakubona kungabe kukuhle kumbe kulezigwenxa kumbe azikho sithi akuqhubekele phambili.''
Osakhulayo omele isigaba seNjube Lobengula Constituency edale lephalamende ofunda eNjube High School uSithabile Nkomo uthi baze ukuzobonisa abebutho ukuthi baqakatheke kangakanani ezweni.
''Ilanga leli ngelokuzohonour amasotsha ethu, kahle kahle sizolicelebrator labo, liqakathekile, sizobatshengisa ukuthi baqakathekile ezweni, benza ilizwe liqoqeke, ngabantu abenza kube leorder ezweni. Amabutho akusobantu okumele sibesabe kahle kahle, ngabantu abafana lathi umahluko yikuthi benza ezweni kuhleleke kubelokuthula, sisebenzisane labo benza izwe leli libe yiZimbabwe.''
Imuli zabakubutho yizo ezize ngobunengi enkundleni eyeWhite City Stadium ukuzathakazelela ilanga eleDefense Fores Day labasakhulayo abanengi.
Umabhalane wekhansili yakoBulawayo, uMnu Christopher Dube laye ubekhona eWhite City Stadium njalo uhulumende ubonge kakhulu ikhansili yedolobho lakoBulawayo ngokulondoloza indawo ebekwa amaqhawe esabelo eyeBulawayo Nkulumane Heroes Acre, ihlanzekile.
