lnkokheli zomdabu labalimi baseBulilima bamukele ngenjabulo uhlelo lwe Intwasa olokubatholisa inhlanyelo lomvundiso bethi lubasize kakhulu ngoba bebengenelisi ukuthenga inhlanyelo emavinkilini ezokulima.
Abalimi beBulilima njengabo bonke elizweni jikelele sebephakathi kokulima ngoba seliqalile izulu ukuna njalo bathola inhlanyelo phansi kohlelo lweIntwasa.
UNkosikazi Sifiso Moyo eBulilima uthi isimo emangweni wabo muhle kakhulu ngoba balungiselele, abalimi abanengi batshayile ugatshopo.
“Emasimini izulu liyana, sitshayile amagodi kagatshopo uma lingaqhubeka lisina sizathola. Inhlanyelo siyithole lomvundiso kuHulumende. Ngithole ama5kg amabili omumbu, 5kg yendumba, i5kg yamazamabane ngazothola ibhinzi zenkomo.”
UNkosikazi Sibongile Nkiwane osuka eThekwane uthi sebenzile konke okusemandleni abo elethemba lokuthi kuzaba njenganyakenye lapho abathole inhlanyelo phansi kohlelo lunye.
“Emasimini sekukuhle sesilimile, ngathola inhlanyelo kagatshopo kubalimisi lami ngileyami njalo eyesintu. Ngikhangelele ukuyitshaya inala ngoba kumnyaka odlule ingincedile inhlanyelo kagatshopo.
Kodwa uNkosikazi Samaria Nkomo esinye njalo isakhamuzi seBulilima yena ukhala ngokuthi ayitholileyo inhlanyelo iphehliwe.
“Inhlanyelo kagatshopo ngayithola impela kodwa eyami iphehliwe ngiyesaba ukuthi ngingayifaka phansi ayizukumila. Ngaphiwa 10kg yomumbu, icowpeas, umvundiso, unyawuthi lezispray.”
UKhansila kaWard 21 koNdiweni uNkosikazi Nani Ndlovu ukhala ngokuthi akakalutholi uncedo phansi kweIntwasa.
“Inhlanyelo yamazambane, isunflower lomvundiso asikutholanga sikhangelele ukuthi abalimisi basitholise masinya leyonhlanyelo ngoba izambane limele lihlanyelwe masinya.”
UNduna Jabulani Ndiweni Mphini uyaluncoma okwamagama uhlelo lweIntwasa.
“Abalimi bayalujabulela loluhlelo njalo inengi labo selitholile linhlanyelo lomvundiso. Luhlelo oluhle njalo ngoba luyephula indleko zokulimisa abalimi bayaluthakazelela sikhangelele ukuba abantu batshaye inala uma izulu lingaqhubeka lisina kuhle.”
UNduna Kandani uMichel Zenzo Magutshwa ukhala ngokuthi inengi alikatholi inhlanyelo lemvundiso emangweni wakhe.
“Bakhona asebelimile esigabeni sami kodwa inengi alikatholi inhlanyelo njalo ivame ukuphuza ukufika, kulabo abapha abantu inhlanyelo ngikhuthaza ukuthi bayiphe abantu kusaselesikhathi ukuze benelise ukulima.”
Ugatsha lukahulumende olubona ngezokulima iAgricultural Rural Extension Services yilo oluqhuba loluhlelo labalimisi ezweni lonke, lapho abantu abadlula izigidi ezimbili sebethe bafundiswa ngohlelo lweIntwasa, batholiswa inhlanyelo lomvundiso kanye lemithi ebulala imihogoyi emizameni yokumelana lokuguquka komumo womkhathi osokukhathaza abalimi ezweni.
