Abanye abalandeli bebandla leZanu PF bathi luqhubeka kahle uhlelo lokuhlala ezindlini loba abantu abanengi besithi kunzima ukuzivalela ezindlini ngenxa yokuswelakala kokudla lokunye.
Abakhonona ngohlelo lolu bathi kalusoze luncede ngoba abantu kabalandeli iziqondiso zokuzivikela kumkhuhlane weCoronavirus COVID-19.
Inkokheli yebandla leZanu PF ithi abantu abanengi balandela kahle uhlelo lokuhlala ezindlini okwamalanga angamatshumi amabili lanye kusenzelwa ukuvinjwa ukumemetheka komkhuhlane weCoronavirus osobulele abantu abafika phose inkulungwane ezingamatshumi amahlanu – 48,200 – emhlabeni wonke jikelele.
Omele iBulilima West edale lephalamende ekubandla leZanu PF, uMnu. Dingumuzi Phuthi, uthi ukusilela kwempahla okwenza abantu baphume ezindlini kwenziwa ngabantu abathenga impahla enengi abayigcina ezindlini lokunye okufanayo.
Uthi luqhubeka ngemfanelo uhlelo lolu emaphandleni. Kodwa uNkosazana Thabitha Khumalo okubandla leMDC uyakuphikisa lokhu esithi uhlelo lolu kalwethulwanga ngemfanelo.
UMaKhumalo uthi inkokheli yebandla leZanu PF ifuna ukuzivikelwa hatshi uzulu weZimbabwe.
Lokhu kusekelwa nguMnu. Chemist Ndlovu, ohlala eMatobo, othi abantu abanengi kabazi lutho ngomkhuhlane weCoronavirus abacabangela ukuthi ugulwa ngabamhlophe labanothileyo.
Kulabantu abayisificaminwe mibili asebetholakale belomkhuhlane weCoronavirus eZimbabwe. Omunye wabo uselamaviki amabili ebhubhile.
Isibhedlela seJohns Hopkins University sibika ukuthi abantu abafika phose isigidi – 951,900 sebebanjwe ngumkhuhlane lo emhlabeni wonke jikele.
Kwele Melika lapho omemetheka khona okumangalisayo sokulabantu abedlula inkulungwane ezingamakhulu amabili – 216,700 abalomkhuhlane lo. Abedlula inkulungwane ezinhlanu sebebulewe yiCoronavirus COVID-19.
