Ekhuluma emkhosini wokunanza lumsebenzi wokukhuthaza ukuhlanyelwa kwezihlala, emele uMeya wakoBulawayo, ukhansila Rafa Moyo uthe bayajabula kakhulu ngesipho esivele eTelone njalo izihlahla ziyimpilo ngoba kuyizo ezihlambulula umoya ophefunyulwa ngabantu. Uthe isihlahla salonyaka ngumbumbulu.
“Ilanga lanamhla liqakathekile ngenxa yokuthi si risive impilo from TelOne,” kutsho uMoyo.
Omunye njalo ojabulele isipho lesi ngumabhalane omkhulu wekhansili yako Bulawayo, uNkosikazi Sikhangele Zhou, yena othi izihlahla zenza idolobho lihlale libukeka njalo lihlanzekile.
Umqondisi weTelone emhlubulweni weMandebeleni umnumzana Wing Sibanda, uthi banikeze iisipho sezihlahla ezedlula inkulungwane ezimbili laloba nje belethe inkulungwane.
Izihlahla lezi zihlanyelwe endaweni yokuphumulela lokuzilibazisa eyeBulawayo Centenary Park kuthi ezinye zizahlanyelwa endaweni ezehlukeneyo edolobheni leli. Amazwe wonke omhlaba abhekane lohlupho lokuguquka kwezomkhathi njalo alomlandu omkhulu wokukhuthaza uzulu ukuthi alondoloze umkhathi.
Kolunye udaba oluhambelana lalolu inkampani yamandla kagetsi eye ZESA inikeze ikhansili yakoBulawayo isipho samabhini angamatshumi amahlanu.
