Umanyano wabodokotela owe Medical Laboratory and Clinical Scientists Council of Zimbabwe uthi amankampani ahlola impawu eziveza ukuthi owesilisa engabe engumzali womntwana kumbe hayi nxa kulokuthandabuza, abalisa eyeGlobal DNA Zimbabwe eholwa nguMnu. Tinashe Mugabe leye Jane of Expediate DNA ekhokhelwa nguNkosikazi Tilder Moyo-Karizamimba kufanele avalwe ngoba kawavunyelwa ukuqhuba umsebenzi lo njengoba engabhalisanga kuhulumende ngokusemthethweni.
Impumela yeDNA etholwa ngamankampani la imenyezelwa emsakazweni lakubomabonakude kunhlelo ezibalisa eye The Closure DNA Show leye Tilder Live Zim Show.
Umanyano lo uthi amankampani la awaqhubi umsebenzi ngemfanelo njalo awabhalisanga kugatsha lwezempilakahle olwe Medical Laboratory and Clinical Scientists Council of Zimbabwe lolwe Health Professional Councils in Zimbabwe.
Inengi elilandela lezi inhlelo liveze imbono ehlukeneyo ngaloludaba.
Omunye walaba ngu Mnu. Henry Sithole yena othi imibiko ye DNA akumelanga iphume kuntathelizindaba.
Kodwa uMnu Michael Sibanda uthi uMnu. Mugabe wenza umsebenzi omuhle ngokuveza amabizo abanikazi babantwana.
Imizamo yokuthola imibono kaMnu. Mugabe ngodaba lolu yehlule kodwa inkampani yakhe yethule umbiko isithi kayisoze yethuselwe ngo dokotela laba ngoba iqhuba umsebenzi wayo ngokusemthethweni.
Asenelisanga ukukhuluma loNkosikazi Moyo-Karizamimba ngaloludaba.
UChris Gande weStudio 7 uxoxe lengcwethi ecubungula ezamasiko uMnu. Thandeko Zinti-Mnkandla ngaloludaba.