Inkampani ye Air Zimbabwe yehlulekile ukuphaphisa indizamtshina zayo ngoMvulo ngenxa yezisebenzi ezikhalala umsebenzi zifuna ukuhlawulwa isikhwele seholo lazo elilokhe lingakabhadalwa kusukela ngomnyaka ka 2009.
Umnu. Innocent Mavhunga umqondisi we Air Zimbabwe uthi kwehlule ukuqalisa inhambo ze Victoria Falls, Bulawayo kanye le Harare ngenxa yabatshayeli bendizamtshina kanye lezinye izisebenzi abathonise isikwelede seholo bengakaphindeli emsebenzini lo.
UMavhunga uthi usahlafuna loludaba lezisebenzi ezingakabhadalwa izigidi ezingamatshumi amathathu lanhlanu zamadollar-$35million.
UMvulo ube ubekwe eceleni ngabaqondisi be Air Zimbabwe ukuthi kulapho okuzasungulwa inhambo zendizamtshina lezi ezimiswe ukuphapha ngenyanga ephelileyo ngenxa yokuswelakala kwemali kanye lokuyabhadalela izikwelede.
Indizamtshina ze Air Zimbabwe zimise inhambo kwele South Africa le Bhilithane ngoZibandlela ngokwesaba ukuthi zingabanjelwa izikwelede ngamankampani atshiyeneyo.
Inkampani ye Air Zimbabwe ilesikwelede sezigidi ezilikhulu lamatshumi amane amadollar eMelika.
Umnu. Willas Madzimure omele ikhomithi yedale lephalamende ebona ngokusetshenziswa kwemali kahulumende lokuthuthukisa inotho yelizwe uthi kungeke kwenzakala ukuthi uhulumende adinge imali yokubhadala izikwelede lezi.
Kodwa-ke uMnu. Mavhunga uthi ulethemba lokuthi konke okuhluphayo eAir Zimbabwe kuzalungiswa.
Ingcwethi kwezenotho uMnu. Masimba Kuchera uthi okuhlupha iAir Zimbabwe yikuthi ibandla le Zanu-PF lifuna ukuyisebenzisa njenge nkampani yalo.
