Abezempilakahle babika ukuba isilinganiso sokuthelelanwa kweCovid 19 eZimbabwe lokhu sisehla ngoba ngokuphetha kosuku lwayizolo kwabahlolwe leli gcikwane kulabantu abangamakhulu edlula amabili-235, abatholakale belalo, labulala abalitshumi lanye-11.
Asebehlatshwe ijekiseni lakuqala lokuzivikela kuCovid 19 sebesedlula izigidi ezine-4,248,300. Kuthi asebehlatshwe amabili sebeyizigidi ezedlula ezintathu-3,277,002, kulabazinkulungwane ezedlula amatshumi amane-46,707, asebehlatshwe elesithathu.
Idale lokwamukela abantu abazangena kukhetho leMatabeleland North lenzelwa koBulawayo eTradegold Magistrate Court uzulu sethe waveza ukukhathazeka kwakhe ngalokhu.
Ibandla le MDC T elikhokhelwa ngu Douglas Mwonzora lenelise ukubhalisa abammeli babo kukhetho lwama by lections lisebenzisa ibizo elithi MDC Alliance. UChamisa usebenzise ibizo elithi CCC kuthi ibandla le Zanu-PF lalo lenelise ukubhalisa.
Idale leNomination Court liyamukele amaphepa alabo abazancintisa kukhetho lukakhansila kuWard 7 eGwanda lamhlanje. Lokhu kwenzakala ngemva kokuxotshwa kwayenguMeya weGwanda uMnu Jastone Mazhale libandla leMDC T esetheswa umlandu yokusekela uMnu Nelson Chamisa.
Abeqembu labesifazane abalitshumi lasithupha 16, abadabuka e Zimbabwe asebehlala kwele Australia, eleCreative Pasisonate Women, sebembise izibhorane ezimbili, zokusiza abahlali bemalokitshini eTshabalala leNtumbane koBulawayo.
Abasungule uhlelo lweOperation dudula kweleSouth Africa oluhlose ukuxotsha abakwamanye amazwe, bafunga bayagomela besithi loluhlelo luzasungulwa endaweni zonke zelizwe.
UMongameli Joseph Biden uthi eleMelika lizafakela izijeziso zenotho umkhokheli wakwele Russia, uMnu. Vladmir Putin, oqhubekela phambili ngemizamo yakhe yokuhlasela eleUkraine.
KuLivetalk namuhla kuhlelo “Diaspora Forum” sikhangela okwenziwa ngabadabuka e Zimbabwe asebehlala kwamanye amazwe.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.