Inhlanganiso ezizimeleyo ezigoqela iHeal Zimbabwe leCrisis in Zimbabwe Coalition zithi zikhathazekile kakhulu ngokulwisana okwenzakala kubandla leZanu PF.
Zithi ukudlephana lokhu sokusenqabela uhulumende weZanu PF ukuthi alungisise inkinga ilizwe elibhekale lazo ezigoqela indlala lokubhidlika komnotho.
“Sithanda ukukhumbuza uMugabe ukuthi ukwehluleka ukuqeda ukulwisana lokhu kuzabangela ukuthi umnotho uqhubeke usiwa ngamandla,” kutsho iCrisis in Zimbabwe Coalition.
“Uhulumende kumele azame ukulwisana lendlala lezinye indubo, hatshi ukulwisana okwenziwa ngamalunga ebandla leZanu PF lokhu.”
Inhlanganiso yeHeal Zimbabwe yona ithi iZimbabwe Human Rights Commission leNational Peace and Reconciliantion Commission kumele zingenele kudaba lolu.
“Sikhuthaza uMongameli Mugabe ukuthi ahloniphe isisekelo sombuso njalo asigcwalisise ngokukhuza amalunga ebandla lakhe ukuze kube lokuthula elizweni,” kutsho iHeal Zimbabwe.
Isiphathamandla salinhlanganiso uMnu Rollings Magede utshele iStudio 7 ukuthi bakhathazekile njalo ngenkethabetshabi ekhanya isikhona kubandla leZanu PF.
