Uhambo lukamongameli Robert Mugabe lokuya emhlanganweni we United Nations General Assembly, eNew York kwele Melika kusetshenziswa inkulungwane lenkulungwane zamadola seludale inkulumo.
Lanxa ingcwethi zisithi loluhambo belusemthethweni imbuzo ekhona ngedalwe yibukhulu bequla lakhe elibalisa umkakhe uNkosikazi Grace, iziphathamandla zikahulumende kunye lentathelizindaba zemisakazo lamaphephandaba kahulumende.
Owayengumphathintambo wezemali, uMnu. Tendai Biti uthi minyaka yonke ngenyanga kaMpandula sekuyisikhathi lapho abaseduze lomongameli Mugabe labamsebenzelayo abakhangelela ngabomvu loluhambo besiyazithengela impahla, benatha, bezijabulela.
Kodwa uBiti, owayengumphathintambo kuhulumende womanyano, uthi udaba ayisilohambo lunye lokuya eNew York kodwa inhambo zakhe ezimbalwa esezitshaphaze umnotho welizwe.
Abazi ngokwenzakalayo bathi abakade bekhaphe umongameli Mugabe baphiwe inkulungwane ezilitshumi lambili zamadola- $12 000 eyokusebenzisa umuntu ngamunye phakathi kwamalanga amahlanu bese New York. Kodwa imizamo yokukhuluma lohulumende ngesilinganiso semali le yehlule.
Ilunga ledale le Central Committee yebandla le Zanu PF, uMnu. David Ndlovu uthi akulalutho olubi ngenhambo zikamongameli Mugabe ngoba uphinda njalo ayabemmele izwekazi leAfrica njengoba engumgcinisihlalo womanyano we African Union.
Kodwa owake waba ngumphathintambo wezobudlelwano lamanye amazwe kuhulumende womanyano, uMnu. Moses Mzila Ndlovu, uthi lanxa ugatsha lwakhe lwalumele lube yilo olukhangelane lenhambo zikamongameli Mugabe leziphathamandla zikahulumende, wayengavunyelwa ukwabela inhambo lezi imali.
UMzila Ndlovu uthi udubo olwabakhona ngesikhathi sikahulumende womanyano yikuthi kwasuka kwabakhona abanye abasebencintisana lomongameli Mugabe ukuvakatshela amanye amazwe betshaphaza imali kahulumende.
Inhambo zikamongameli Mugabe zengezelelwe lumnyaka kulandela ukukhethwa kwakhe ukuba ngumgcinisihlalo wenhlanganiso ezimbili, I African Union leyomanyano wamazwe angezansi kwezwekazi leAfrica, eye SADC okubangele ukuthi umnyaka uqala ubesethekelele emazweni angamatshumi amabili lanhlanu esebenzisa izigidi lezigidi zamadola.
