Kuhlandla lezomculo intathelizindaba yethu yezemidlalo uJoseph Njanji usipha ingxoxo ayenze labaculi abacindezela ngaphansi kwenhlanganiso ye Nu Era Studios bona abathi injongo yabo yikupheka umculo ozwakala loba kubani ukuba ngowase Zimbabwe ngoba bekhathele ngokulingisela abaculi bakwamanye amazwe.
UNgqabutho Moyo, owaziwa ngegama lokucula elithiwa ngu Bobz, ungu producer estudio se Nu Era esitholakala edolobheni lako Bulawayo.
Lumculi uqale ecula ingoma zohlobo lwe Hip hop kwathi ngemva kwesikhathi waqala uku producer abanye abaculi.
Ekungeneni kwakhe kwezomculo ubecula esebenzisa ulimi lwesingisi ikanti lengoma zakhe bezifana nje xathu lezalabo abenza ingoma zohlobo lwe Hip hop eziculwa kakhulu elizweni lase United States.
Kuthe ngokuhamba kweminyaka uBobz uthi unanzelele ukuba umculo wabasakhulayo ikakhulu edolobheni lako Bulawayo awuphumeleli ngoba ungela phawu.
Isibonelo sokuba ukucula ngendimi zesintu kwenza abantu bethakazelele umculo basibone elizweni le South Africa lapho ukuhlanganisa umculo we Kwaito le Hip hop sokudale uhlobo lwezomculo oluthiwa yi New Age Kwaito.
Lo ngumculo osebenzisa iziginci ezivela kwele Melika kodwa abahlabeleli becula besebenzisa izihlobo ezikhulunywa ngabensundu njalo beboleka ingoma ezake zadla ubhedu ngeminyaka eyadlulayo.
Umculi osebenza lo Bobz uJermaine Magumise yena owaziwa kwezomculo ngegama elithi Lucky Charm uthi uke wenza ingoma ezinengi eze Hip hop ehlabela ngesilungu kodwa azizange ziyengaphi yikho esecabange ukuba ahlanganise lamachacho esintu ukuze imisebenzi yakhe ithakazelelwe ngabantu.
UBobz uthi basebenza labaculi abatshiyeneyo kungakhathalekile ukuba benza mhlobo bani wengoma ngoba injongo yabo yikuba bacine bephume lomculo ozakuba lophawu olucacileyo ukuba uphekwe kwele Zimbabwe.
Sivale uhlelo ngengoma yomculi ozibiza ngokuthi ngu Bluechord yona ehlanganisa amachacho akulezinsuku kanye leMbira.
