Abadabuka eZimbabwe asebehlala kwele Canada ababhekane lodubo lokuthi bangaphindiselwa ekhaya ngoba bengela ngwalo ezisemthethweni zokuhlala kulelozwe, sebenikwe ezinye inyanga eziyisithupha ukuthi balungisise ingwalo zabo ukuze bahlale okusemthethweni.
Lesi sandla somusa eselulelwe abe Zimbabwe labe Haiti nguhulumende weCanada simisa zonke izinqumo ebesezithethwe ukuphindisela labo abangela ngwalo zokuhlala emthethweni elizweni.
Umpathintambo obona ngezenhlalakahle kazulu kwele Canada umnumzana Ralph Goodale, nguye owenze lesi simemezelo esithi kuyisifiso sikahulumende wakhe ukunikeza umuntu wonke wokuza ilungelo lokuthi ahlale elizweni lakhe engahlukumezekanga emoyeni ukuthi angaxotshwa yiloba yisiphi isikhathi yikho ethethe lesi sinqumo somusa esiqondiswe kuzizalwane zeZimbabwe leze Haiti.
Babikwa besedlula inkulungwane ezilikhulu lamatshumi phose amathathu abantu baseZimbabwe abahlala kwele Canada esikhulumanje bengela ngwalo ezisemthethweni zokuhlala kulelozwe abangabe bebhekane lokuphindiselwa ekhaya.