Ingcitshi zezemfundo zithi imfundo yeZimbabwe ayiphathisi kangako intuthuko yelizwe lempilo kazulu ngoba ifundisa abantwana ngendlela ebatshiya bengelalwazi lokuzicabangela ngokujulileyo indlela zokuziphilisa lapho bengaqatshwanga.
Udokotela Pedzisai Ruhanya obona ngezamalungelo abantu utshele umhlangano wokuhlolisisa ngezemfundo yakuleli owenzelwe emahofisini obudlelwano besigodlo seMelika lozulu kuleli ngeviki edluleyo ukuba ukutshapazeka osokusenza ezombusazwe elizweni kwabangela ukuba kube lokusilela kosekelo kwezemfundo uhulumende eqakathekisa amandla embuso wakhe izinto zisonakala.
Umnumzana Thuthani Moyo wenhlanganiso ye YET ephatheka kwezemfundo uthi ngendlela emi ngayo imfundo okwamanje elizweni ayihlolisisi inqondo zomuntu ngokupheleleyo.
UNkosikazi Rebecca Zigla-Mano obona ngezemfundo esigodlweni sommeli weMelika kuleli njalo eke wafundisa ezikolweni ezitshiyeneyo kuleli kugoqela lasemaphandleni uthe kuyadingakala ukuba imfundo ihlole umuntu ngokupheleleyo ingakhangeli kuphela impumela yemihloliso ethi kukhanya inengi lezifundi kuleli zigijimisana lokuthola impumela enhle kumihloliso lokudinga imisebenzi kuphelele khonapho.
U Dokotela Tendai Nchila ofundisa kugatsha lwezemfundo eUniversity ye Zimbabwe uthi imfundo ikhanya isalela ngoba noma bekhona omanjinela lencitshi emisebenzini ethile asibaboni belungisa izinto esingaziqenya ngazo njengelizwe ethi sokungadingakala ukuba kuguqulwe indlela abantwana abafundiswa ngayo ukuyinto u Moyo avumelana layo.
U Dokotela Ruhanya uthe ukusilela kosekelo kwezemfundo lemisebenzi yokucubungula yikho okucina kubangela ukuba imisebenzi yezemfundo kunye lesizwe kungathuthuki kubangelwa yikwehluleka kucele likahulumende.
U Dokotela Patson Dzamara wazise umhlangano ofanayo ukuba kuqakathekile ukuba imfundo ibe ngengenelisa ukuthuthukisa umuntu iphinde ibe ngengasetshenjiswa ekuthuthukisweni kwesizwe.
Unkosikazi Zigla-mano uthi sikhuluma nje abantwana baphuma ezikolo bephumelele kakuhle ezifundweni zabo kodwa bengenelisi ukwenza lutho empilweni ngitsho lokusebenzisa imitshina yangalezi nsuku yama computer ngokuzwayo ngengakumabhizimusi.
Uhulumende we Zimbabwe uthi sethatha imicijo kugwalo lwezicwayiso zika Dokotela Nziramasanga ezikhuthaza inguquko kwezenfundo ezahlanganisela lemisebenzi yezandla.