Uhulumende we South Africa uthi useqalisile ukukhulumisana lamazwe asevimbe indizamtshina ezisuka emazweni angeZansi yezwekazi leAfrica agoqela eleZimbabwe kulandela ukutholakala kohlobo olutsha lweCOVID 19 okuthiwa yi B.1.1. 529 kulelolizwe, esithi bekungadingeki ukuthi kuthathwe lelinyathelo.
EleSouth Africa lithi amazwe aphetsheya awathathi inyathelo elifanayo kungatholakala umkhakha omutsha waleligcikwane kwamanye amazwe, ngakho kusabandlululo lwamazwe ase Africa njalo kuzaphazamisa inhlelo zokuvakatshelana kanye lokuqhutshwa kwamabhizimusi.
Amazwe la abalisa eleBhilithane, eleMelika, eleFrance, lamanye.
Ukuhlaziya loludaba, sixoxa loMnu. Vusumuzi Sibanda, umgcinisihlalo wenhlanganiso elwela amalungelo oluntu eye Africa Diaspora Forum.
Kusenjalo umphathintambo obona ngezempilakahle uMnu. Constantino Chiwenga ubikwa esithi uhulumende weZimbabwe uliqaphele leli gcikwane njalo usekhuthaze abantu akuthi behlatshwe ijekiseni yokwenqabela ukumemetheka kweCOVID 19. Ugatsha olubona ngezempilakahle luthi abantu asebehlatshwe lijekiseni elizweni sebefika phose izigidi ezine; 3, 7 million.