lnengi labantu bakoBulawayo ngoLwesihlanu belisendleleni ligada amabhasi ukuze liyedlalela iKhisimusi ekhaya lokulinda unmyaka omutsha kungakhathalekile lokungamanga kuhle komnotho elizweni kanye lokukhwaza kobhubhane weCovid-19.
Lanxa ubhubhane lweCovid 19 lokhu lukhwaza ngolaka, inengi belilokhu liphithizela eRenkini lifisa ukuba lithi liphuma ilanga langoMgqibelo babe sebesekhaya ukuya hlanganela labomdeni ngeKhisimusi bemelela njalo ukwehlukana kweminyaka besamukela umnyaka omutsha bendawonye.
UMtshayeli wemota ezincane ezithwala abantu, uMnu Methuseli Ncube uthi yebo bayahamba abantu kodwa ibhizimusi liphansi.
"Thina siyakhonapha eNkayi eCentre, akulabhizimusi amabhasi manengi kakhulu sibhadalisa ama hundred Rand, amapholisa ayasihlupha futhi asithathela imali."
UMnini webhasi uMnu Samuel Shumba uvumelane loNcube.
"Ukuhamba abantu bayahamba balutshwana umasiqathanisa lamanye amakhisimusi asazi ukuthi abantu abalamali kumbe yikuyini sijayele ukuthi mhlaka 24 sithwale siphinde siphenduke sizobathwala kodwa lonyaka balutshwana abantu."
Isakhamuzi sakoBulawayo uNkosikazi Phumuzile Ndlovu uthi kunzima ukuya ekhaya wesaba ukubamba iCovid-19.
"Sibhekane lekhisimusi ngesikhathi seCovid-19, ikhisimusi siyidlala nzima ngelanga lokukhumbula ukuzalwa kukaJesu manje ngenxa yeCovid siyesaba lokuphuma ukuthi siyezikhupha labangane."
lnengi liphakathi kokuhamba kuthi abanye sebefikile lapho abayakhona sekuhlatshwa imbuzi, inkomo, inkukhu lokunye okuhlukeneyo abantu bekhangelele ukuthakazelela ilanga lakusasa leKhisimusi elithakzelelwa mhla zingamatshumi amabili lanhlanu NgoMpalakai elithakazelelwa ngamakholwa amanengi ngoba limumethe imbali eqinisa ukholo lwabo.
