Inkampani ye Air Zimbabwe isimise indizamtshina zayo zonke ukuthi zingaphapheli kwele South Africa ngenxa yokwesaba ukuthi zingabanjelwa isikwelede senkulungwane ezingamakhulu amahlanu amadola okumele sibhadalwe iBid Air Services ekhangelane lokwethula impahla kundizamtshina ezitshiyeneyo eOliver Tambo International Airport.
Inkampani ye Air Zimbabwe ibikwa ithethe isinqumo lesi ngenxa yembiko ethi iBid Air Services izaphinda njalo ibambe indizamtshina ye Air Zimbabwe njengalokho ekwenze kumaviki ambalwa asanda kwedlula eSouth Africa.
Isinqumo se Air Zimbabwe sesitshiye abakade bemele ukugade indazamtshina lezi koBulawayo, eHarare le Victoria Falls betshe amathe. Akwaziwa ukuba abantu laba bazakuyangaphi okwamanje.
Ingcwethi kwezenotho uMnu. Rejoice Ngwenya ithi lokhu okwenziwa yi Air Zimbabwe kuyayangisa njalo sesifikile isikhathi sokuthi uhulumende ayehlukane lenkampani le.
Kusenjalo, abantu abazinkulungwane ezingamakhulu amabili abase Gatwick International Airport lapho okubanjwe indizamtshina ye Air Zimbabwe yi American General Supplies ngokungabhadali isikwelede, lokhe behlezi egcekeni lendizamtshina.
Umnu. David Mwenga umqondisi weAir Zimbabwe eEurope uthi inkampani le izama ngamandla wonke ukuthi ibhadale isikwelede esedlula isigidi samadola.
Omunye wabaqondisi be American General Supplies uMnu. Kenneth Conor uthi indizamtshina ye Air Zimbabwe ebanjwe eGatwick kayisoze isukume egcekeni lelo isikwelede sonke singakabhadalwa.
UConor uthi okwamanje iAir Zimbabwe isibhadele imali engaba yisigidi samadola eMelika.
Omele labo akade kumele bagade indizamtshina le abase Gatwick uMnu. Ezra ‘Tshisa’ Sibanda uthi lokhe bethwele nzima njengoba kungakhanyi lokuthi kwenzakalani.
