Indizamtshina ezintathu ze Air Zimbabwe sezimiswe ukuphapha yinhlanganiso ye Civil Aviation Authority of Zimbabwe ethi kazisalungelanga ukuthwala abantu ngoba sezindala kakhulu okwenza zibe yingozi kuzulu.
Ama Boeing 737 lawa abikwa kade esetshenziswa ukuthwala abantu eZimbabwe kanye lendaweni ezitshiyeneyo ezansi yezwekazi le Africa.
Abikwa njalo esesebenze kwaze kwadlula okuvunyelwa ngamazwe womhlaba. Lokhu sokutshiye abantu abanengi bebhekane lohlupho endaweni ezitshiyeneyo eZimbabwe, South Africa, Zambia kanye le Democratic Republic of Congo bengazi ukuthi bazahamba ngani.
Kusenjalo, indizamtshina eyathengwa kwele China ekade kumele ithwale abantu abaya eVictoria Falls yehlulekile ukuphapha ngoLwesibili eHarare ngenxa yokugugudeka kwensimbi zayo.
Lokhu kuphinde kwagcizelelwa yikuthi iAir Zimbabwe ixotshiwe ngoMgqibelo ukuba lilunga le International Aviation Transport Association ngenxa yokwehluleka ukubhadala imithelo efunekayo.
Kazipheleli lapho indubo ze Air Zimbabwe njengoba le Air Zambezi eyanika inkampani le ngesikwelede indizamtshina ye Boeing 737-500 ithethe okungokwayo isithi isiyehluleka ukubhadala imali efunakalayo ngenyanga.
Ingcwethi kwezenotho uMnu. Rejoice Ngwenya uthi okwenzakala Air Zimbabwe kulakho ukuyibhidliza ngakho sokumele uhulumende adinge inkampani engayivusa.
