Uhlangothi lukahulumende olubona ngokulotshwa kwemihloliso olweZimbabwe School Examinations Council (ZIMSEC) ngoMvulo lwazise ukuthi impumela yemihloliso yeOrdinary Level eyomnyaka ophelileyo isiyethulelwe abafundi okusemthethweni.
Inani lezifundi eziphumelele kulimihloliso liqansile nxa liqathaniswa lelomnyaka ka2022.
Inani lezifundi ezenelise ukuphumelela kulimihloliso zapasa izifundo ezinhlanu kusiya phambili zifika kusilinganiso sokungamatshumi amabili lasitshiyagalolunye - 29.41%. Inani leli likhwele lisuka ku 28.96% eyomnyaka ka 2022.
Ekhuluma lentathelizindaba eseHarare namuhla umgcinisihlalo webhodi leZIMSEC uProfessor Eddie Mwenje uthe inani lezifundi ezabhala limihloliso lehle lisuka ku 278,760 eyomnyaka ka 2022 lisiya ku 270,129 eyomnyaka ka2023.
Exoxa leStudio7 uMnu Stevenson Dlamini ongumbalisi ekolitshini leNational University of Science and Technology uthi izidakamizwa ngolunye udubo olubangela ukuthi inani lezifundi eziphumelela ezifundweni liqhubekele phambili liphansi.
Lokhu kwenzakala ngalesi sikhathi ababalisi besithi sebekhalale imisebenzi bekhonona ngeholo abathi liphansi.
Bathi bafuna iholo le US$1 200 njalo okwakhathesi bahola i$US250 leyinye ingcosana yemali yeZimbabwe.
Unobhala jikelele weHarare kunhlanganiso emela ababalisi eyeAmalgamated Rural Teachers Union of Zimbabwe, ARTUZ uMnu Munyaradzi Masiiwa uthi ababalisi bonke sebekhalale umsebenzi.
Kodwa uhulumende yena uthi akula babalisi abakhalale imisebenzi. Isikhulumeli sogatsha lwezemfundo yePrimary leSecondary uMnu Taungana Ndoro uthi abakhangelelanga ukuthi kube lokukhalala imisebenzi kwababalisi lonyaka.
Forum