Ikhomishini ebona ngezokhetho eyeZimbabwe Electoral Commission-ZEC, yethule umbiko othi abantu abangaphezu kwezigidi ezinhlanu-5,154,480, sebenelise ukubhalisela ukuvota elizweni lonke jikelele.
Abangaba zinkulungwane ezedlula kancane ezilitshumi lasikhombisa babo bengabakoBulawayo, asebebhalisile selokhe kuqeliswe uhlelo olweBVR Mop Up Exercise ekuqaleni kuka Zibandlela.
Ikhomishini ebona ngezokhetho eyeZEC ithi izabelo ezilabantu abanengi ababhalisileyo yiHarare elenkulungwane ezingamakhulu edlula ayisitshiyagalombili-(811,410) silandelwa yinkabazwe elenkulungwane ezingaphezu kwamakhulu ayisikhombisa (702,518).
Izabelo ezilenani labantu elilokhe liphansi yiMatabeleland South elenkulungwane ezingaphezu kwamakhulu amabili (231,002) leBulawayo elenkulungwane ezingaphezu kwamakhulu amabili (231,740).
Oqhuba inhlelo zokubhalisela ukuvota koBulawayo kuZEC, umnumzana Silas Silaigwana uthe inengi lasebebhalisileyo koBulawayo ngabasakhulayo.
NgoLwesithathu inhlanganiso ezizimeleyo beziqoqe umcimbi wokuhuga abantu ukubhalisela ukuvota phakathi kwedolobho lakoBulawayo.
Emcimbini lo bekulamaqembu ajaivayo lezipho ebezinikezwa abantu ababhalisela ukuvota.
Osebenza lenhlanganiso yePledge ngaphansi kwe hashtag Ballot Buddies umnumzana Vusumuzi Chirwa uthe bakhuthaza kakhulu abasakhulayo ukubhalisela ukuvoter ngenxa yokuthi balinani elikhulu elizweni kodwa basalele emuva kwezombusazwe.
Osakhulayo owenhlanganiso ye Contemporary Affairs Foundation unkosikazi Keitumetsi Nyathi uthe bakhuthaza abatsha ikakhulu ngoba abazimiselanga ukuphatheka enhlelweni zokuthuthukisa isizwe.
Omunye osakhulayo uPrimrose Nyoni uthe bakhuthaza abanye abasakhulayo ukuthi babhalisele ukuvota khona beza vota njalo balethe utshintsho ukuze bathole imisebenzi. Uthe inengi labasakhulayo bachitha isikhathi sabo esinengi besenza izinto ezingalunganga.
Inhlanganiso ezizimeleyo ziphakathi kweminkakhaso etshyeneyo elizweni lonke jikelele yokukhuthaza abantu ukuthi babhalisele ukukovota ngobunengi njalo besipha imfundiso yokuqakatheka kokwenza lokhu lokudingekayo ukuthi babhalise lula lapho abantu befuna uncedo lokuthola ezinye zengwalo ezidingakalayo baqondiswe enhlanganisweni ezimele lowo msebenzi.
Inengi likazulu lithi ngesikhathi I ZEC iqala uhlelo lweBVR ayizake yenze imikhankaso eqine njengalokhu osekusenzakala khwathesi, okusolelwa ukuthi yikho okwenza inani labantu ababhalisa kumahlandla akuqala libe phansi.
