Izakhamizi zedolobho leHarare zithi ukulungisiswa kodubo lokucitheka kwamanzi empompini ezinkulu eziwathwalayo ngemva kokudabuka ibikwa ingenye yendlela engaphathisa kakhulu udubo olubhekana lamakhansili ekutholiseni abantu amanzi.
Ngesikhathi inengi lamadolobho libhekana lobunzima bokutholisa uzulu amanzi enelayo imizamo yokulungisisa ukucitheka kwawo empompini eziyabe zidubukile, ikhanya isalela muva omasipala bekhangela udaba lokudinga izikwelede zokwengezelela inani lamanzi abalawo.
Imizi efana le Tafara, Mabvuku, eHarare le Chitungwiza isilesikhathi eside ibhekana laloludubo njalo umgcinisihlalo wenhlanganiso yezakhamizi ze Chitungwiza umnumzana Marvelous Khumalo ethi bahlala besitsho ukuba lindawo ize ibe lomthombo wayo wamanzi izaqubekela phambili ibhekana laloludaba.
Umnumzana Trust Nhubu osanda kuqeda izifundo zaphezulu zobumanjinela bokugcinwa kwamanzi uthi udubo okumele omasipala bonke belunanzelele kuqala yikulungisisa ukucitheka kwamanzi empompini bengakagijimeli ukuyadinga izikwelede ngoba amanzi anje angenelana labantu.
Uthi ngemva kwenhlolisiso yokulungiswa kokucitheka kwamanzi omasipala bengenelisa ukuhlola umumo wezinto lokuthi lokhe besadinga amanye amanzi na njalo ekunani elinganani. Uthi uzulu laye kumele adinge ezinye indlela zokuthola ngazo amanzi ezigoqela amanzi ageleza ngaphansi komhlabathi lacitheka kumathanga ezindlu zabo kusina izulu.
Omasipala abanengi eZimbabwe babhekana lobunzima bokutholisa abantu amanzi ngokugcweleyo njalo uzulu ekhala ngokuvalelwa kwamanzi mahlayana.
Amakhansili athi abhekana lodubo lwemali engeneli ukuba bengezelele amadamu amanzi anganathwa lidolobho kunye lokulungisisa impompi ezicitha amanzi ngasikhathi sinye.