Ihungahunga phezu kwesimo sempilakahle kamongameli Robert Mugabe kodwa lilandulwe yinkokheli yeZanu PF lesikhulumeli sakhe umnumzana George Charamba besithi ngamanga aluhlaza njalo elilomona.
Abanye ngabathi lanxa umongameli Mugabe esekhulile, kusuke kube nzima ukulikholwa leli hungahunga njengoba kungelihlezi likhulunywa minyaka yonke ngaso lesi sikhathi somnyaka.
Umongameli Mugabe lonkosikazi wakhe uGrace Mugabe kanye lemhuli yakhe yonke, bakukhefu sikhulumanje, endaweni engaziwayo emazweni angempumalanga, lapho abasuke belukbhekise khona ngemva komhlangano weConference yebandla lakhe leZanu PF kunyanga kaMpalakazi.
Lanxa isikhulumeli sehofisi yakhe umnumzana George Charamba kanye lesikhulumeli se Zanu-PF umnumzana Simon Khaya Moyo belilandule leli hungahunga, elithi usegulela ukufa ngemva kokuqaleka ebanjwe yisifo senhliziyo, lokhu sekwenze abanntu bakhulume ngendlela ezehlukeneyo. Kambe kuyini okungenza uzulu weZimbabwe asuthiseke phezu kwaloludaba?
Umnumzana Themba Sibindi wasemzini weQueensdale eHarare uthi lanxa sekuyinhlalayenza ukuba libe khona ihungahunga laloluhlobo, sikhona isidingo sokuba uhulumende atsho okuyikho phezu kokuba kuyini okwenzakalayo.
Wengeza uSibindi ethi ngaye uyaziveza umongameli njengoba bekhona asebekukholwayo lokho okukhulunywa ngabantu.
Umnumzana Japhet Chibanda wase Mabvuku yena uthi kungesinto elungileyo lokho okwenziwa ngabanye, ukufisela umongameli ukuba afe, kuphambana lesiko lesintu sasezwekazi leAfrica.
Ubeka intathelizindaba umlandu wokube lokhe betshotshozela kulokhu kukhuluma, okuyinto ayisole kakhulu ethi ngoba kungalunganga, kungatshengisi inhlonipho njengoba umongameli Mugabe kungumkhokheli welizwe okumele ayitholiswe inhlonipho.
UMugabe onguye njalo umgcinisihlalo wenhlanganiso yomanyano wamazwe akuzwekazi labensundu owe African Union ukhangelelwe ukuphindela ekhaya ekupheleni kwayonale inyanga kaZibandlela ngemva kokugqiba ikhefu lakhe.
