Inkampani ye Impala Platinum yakwele South Africa elemashares ku Zimbabwe Platinum Holdings lamanye amankampani ezemigodi kwele Zimbabwe ithi kayisoze ikhalale imigodi yayo ngenxa yokuthi iyethuselwa ngumphathintambo wezokuthuthukisa inotho kazulu osefuna ukuthi yabele abantu makhaza amashares okuhambelana lomthetho we indigenization.
Umqondisi wenkampani le uMmnu. David Brown okhangelelwe ukwenza umhlangano loMnu. Saviour Kasukuwere kunsukwana ezilandelayo, utshele iReuters ukuthi uzabonisana laye indlela eziqondileyo zokwabela uzulu amashares.
Umnu. Kasukuwere uthi usediniwe ngokukhulumisana le Impala Platinum lamanye amankampani angaba ngamatshumi amathathu ezemigodi angafuni ukwabela uzulu amashares.
Uqhubeke uKasukuwere ethi uhlelo lolu luzaqhubekela phambili loba nje amanye amankampani engalufuni.
Inkampani ye Implats inikwe amaviki amabili ukuthi yethule ugwalo oluzatshengisa ukuthi izakwabela njani uzulu amashares angamatshumi amahlanu lanye ekhulwini.
Unkosazana Dorcas Sibanda omele iBulawayo Central edale lephalamende uthi okwenziwa nguMnu. Kasukuwere kubulala ilizwe.
Impala Holdings Ithi Kayisoze Ivale Amankampani eZimbabwe Loba Ihlutshwa NguKasukuwere
- Gibbs Dube
