KuWoza Friday liviki uBenedict Nhlapho usilethela umdlalo womfanekiso webhayisikopo, i-movie, engeyakuqala ukwenziwa ngolimi lwesiKhalanga, isenziwa lokulingiswa yizizalwane zeZimbabwe phansi kwesihloko esithi "Gwendo Gwe Butjilo" kusitsho Uhambo Lwempilo.
Lezi insizwa zeSikhalangeni ezibalisa uDesire Dube, Mbiwabo Ndebele, Embassy Dube, Bhatanani Ndebele lo Gerald Ncube, zithi zahlala phansi zadlamathambo enqondo ngokufa kolimi lwesikhalanga.Zithi zathi zithi zivusa amakhanda omunye eselikhandile icelo lokukhanda umdlalo wokulingisa ngolimi lwesikhalanga.
Livikike sebeliphekile lavuthwa iDVD lalo umdlalo olesihloko esithi "Gwendo Gwe Butjilo" kusitsho Uhambo Lwempilo.
Ludaba lomfana omcane uBakidzanani owabaleka esikolo wabhekisa amabombo eGoli engazi muntu engazi ndawo. Yavuka eseganga impilo, waswela indawo yokulala, inkwelo zayiqalivokloklo esiswini, kwangathi yingane ihlaselwe yimbedumehlwana.
Waphenduka waba yikudla kotshwala kwazise lemali yayingekho ebudludla ngezikwelede.UBhatanani Brian Ndebele uthi sikhulu isifundo esiqukethwe ngumdlalo wabolo.UBakidzanani yenake wayesephila ngemithandazo
UDesire Dube uthi lumdlalo uphekwe ngobuciko obukhulu kantike okunye okukuwo kubuya phetsheya kolwandle.
UBakidzanani wazama ngazo zonke indlela zokuthi adinge abakubo kodwa kwehlula wacina esehlala lomunye untombazana obethandana laye kanti lakho uzawukhomba umuzi olotshwala. Wathike kungcono azame abaphorofethi, kanti usezithezele olule nkume.
U Embasy Dube uthi ukutshona umuntu elandisa yikuchitha isikhathi, zithengele lawe leli DVD uzwe ukuthi loludaba lwaphetha ngani.
Kambe wena ubona angathi loludaba lwaphetha ngani sibili? Kwaze kwathi ngemva kwesiga esehlela umfowabo, kwayikhona uBakidzanani ebonana labakubo impilo lakuye yaqala ukuba butshelezi.
Isisusa saloludaba siphuma kuDesire, kantike ukulingiswa kwalo kwakuqondiswa ngu Mbiwabo Ndebele, kwathi u Embassy kwaba nguye olobayo, UBrian Mange kunguye ophethe umtshina wokuthapha imifanekiso, Kwathi uGerald Ncube kwaba nguye oyeluka yonke imifanekiso kwaphuma uluju lwamehlo lendlebe olubizwa "Gwendo Gwe Butjilo".
