Kuhlelo lwamasiko lenhlalakahle kazulu, ngoLwesibili sixoxa ngokwehlela abatshadileyo eZimbabwe abakhathazwa yikugugudeka komnotho welizwe okwenza ukuthi kungatholakali imali yokuphandela imuli.
Immuli ezinengi zikhanya sezidilika ngenxa yokuswela imali okubangelwa yisimo esibi somnotho welizwe. Akulanani eseliphume mgceke ngemuli esezidilizwa yikuswelakala kwemali. Impilo yabantu kayisafani layizolo lapho okwakulenotho etshiyeneyo okunjenge zifuyo lokunye.
Kambe bekusenzakalani ezindlini nxa kuswekalala imali kumbe okuphilisa immuli? Kungenziwani lamhlanje?
Ukuze sihlaziye udaba lolu sixoxe loMnu. Nicholas Moyo ongumsekeli womqondisi wohlangothu lukahulumende olukhangelane lezemasiko othe zinengi kakhulu immuli ezibhekane lodubo lolu.
UMoyo uthe, “Okwenza kubenje yisimo esibi somnotho welizwe okucina kusenza ukuthi obaba bengenelisi ukuthenga okufunwa ngamakhosikazi abo. Imali iyahlupha kakhulu elizweni okufika kusibanga sokuthi abanye abesilisi bayagogodlela imadlana abayitholayo kuthi-ke amakhosikazi abo angafumanisa ukuthi indoda ilemali engavezwanga ekhaya kuhluphe kakhulu.
“Kulabesifazane abakwenzayo khonokhu okubangela ukuthi kubelokulwa emmulini. Konke lokhu kungaqedwa yikuthi umuntu aveze imali ayiholayo.”
Uphinde wathi izolo bekulezifuyo lenotho ebambekayo ngakho bekungakhathazi kakhulu ukuvezela immuli inotho.