Ugatsha lwentuthuko yezabelo lutshele amalunga ekhomidi yedale lephamende ebona ngembuso yezabelo ukuba selwanelise ukulungisa iziqondiso zokubunjwa kwemithetho emithathu ebalisa owe Local authorities bill, Provincial and Metropolitan Councils and Administration Bill lowe Traditional leaders amendment Bill.I-Urban Councils Bill yona izamanyanisa imithetho emibili, owe urban Councils Act lowe Rural District Act.
Esethula lumbiko ngoLwesithathu phambi kwekhomidi ekhokhelwa nguNkosikazi Irene Zindi, eye Local Government, umphathintambo wentuthuko yezabelo uDr Ignatious Chombo uveze ukuba ama bill la womathathu aselungele ukusiwa edale labampathintambo ele Cabinet ngemva kokuxoxisana phakathi kwenhlangothi ezehlukeneyo.
U Chombo uveze njalo ukuba nxa esepasisiwe kuzaphathisa ukuba abogatsha lwakhe babhidlize izakhiwo ezakhelwe endaweni ezingekho emthethweni.
Ukhuthaze uzulu ukuba afunde ukulandela imithetho hatshi okutshiwo ngabezombusazwe ethi kwenqabela ugatsha lwakhe ukubhidliza izakhiwo ngoba lokhe ingakalungisiswa imithetho ukuze ihambelane lesisekelo esitsha sombuso.
Kodwa abakhulumisane le Studio Seven bathi bamangaliswa yikwenza kukaChombo. Omunye walabo abatshengise ukukhathazeka ngumnumzana Nkosana Dlamini oyisakhamuzi seHarare.
Kulezindlu ezedlula inkulungwane ezilitshumi lane ezibikwa zakhelwa endaweni ezingekho emthethweni uhulumende athi kumele zidilizwe njalo abanikazi balezi zindlu kumele babhadalele indleko yokudilizwa kwazo kodwa bazaphiwa ezinye indawo zokwakhela.
Ngakolunye udaba olwenzakale eHarare ngoLwesithathu umphathintambo wezemali umnumzana Patrick Chinamasa uveze ukuba amalungiselelo asekusibanga esiphezulu okuba kubunjwe ikhomidi ezahlolisisa phezu kodaba lwezimali zamampentsheni eye Insurance and Pensions Commission.
UChinamasa utshele umhlangano lentathelizindaba ngoLwesithathu, emahofisini akhe ukuba injongo yale khomidhi kuyikuhlolisisa phezu kwezikhalazo ezithe zaba khona phezu kwezimali zamampentsheni eziphazanyiswe yikusungulwa kokusetshenziswa kwemali yakwamanye amazwe eZimbabwe.