Ikhansili yeHarare isiqale imihlangano yokudinga imibono kazulu ngakukhangeleleyo ekusetshenzisweni kwemali yomnyaka ozayo, iBudget, ngesikhathi amakhansili emadolobheni atshiyeneyo evele esehluleka ukugcwalisa indingeko zezakhamizi ezinjengamanzi ahlanzekileyo aneleyo, ukubutha izibi, ukulungisa imigwaqo kanye lokunika abathengisayo indawo ezaneleyo zokusebenzela.
Eminyakeni esanda kwedlula amakhansili emadolobheni eZimbabwe athwele nzima ukugcwalisa indingeko zikazulu osokutshiye ubudlelwano lezakhamizi kuyingwe lenja.
Amakhansili ahlezi edinga ukukhweza imali yebudget minyaka yonke kodwa izakhamizi zikhonona ngokuthi akulamsebenzi omuhle owenziwa ngamakhansili la, pho imali ikhwezwelani.
Isiphathamandla senhlanganiso yeCombined Residents Association of Harare, uMnumzana Mfundo Mlilo, uthi amakhansili athwele nzima ngoba uhulumende sewatshiya umlandu wakhe wokunakekela abantu lokuphathisa amakhansili ngemali yokuqhuba inhlelo zenhlalakahle kazulu.
Ngenxa yokuswela imali, uthi amakhansili asesethesa umlandu wokuletha imali kuzakhamizi lazo ezivele ziyikhotha imbenge yomile.
Isakhamuzi, uMnumzana Mlondolozi Ndlovu, uthi insuku ezibekwe yikhansili ukukhulumisana lozulu azeneli ngoba ngamahola amalutshwane ngandawo ngandawo okutshiya inengi lingahambisanga imbono yalo.
Okumele kuqakathekiswe yikhansili kumnyaka ozayo, uthi yikunika uzulu amanzi ahlanzekileyo kundawo zonke ngoba lokhu lilungelo elikhona lakusisekelo sombuso njalo kuguqulwe imithetho yemadolobheni ukuze abathengisayo benelise ukukwenza lokhu bengahlukunyezwanga.
Uthi minengi imbiko elokhu iphuma ukuthi abathengisayo babanjiswe ingqamu ngasebukhalini bayo ngamapholisa kamanisipala adinga ukufumbathiswa njalonje njalo lendawo zokuthengisela ziyasilela.
UMlilo uqhubeke esithi kumali etholwa yikhansili, kumele kuqakathekiswe inhlelo zezakhamizi hatshi iholo leziphathamandla.
Emalini yonke etholwayo, uthi amatshumi amathathu ekhulwini kuphela yiyo okumele iye kuholo lezisebenzi kodwa eminyakeni le kukhanya imali phose ingxenye ekhulwini isisebenza iholo lezisebenzi.
Bayaqhubeka bekhulumisana lekhansili ngendlela ezingasetshenziswa ukuze indingeko zikazulu zigcwaliseke, ikhansili layo iqhubeke isebenza ngendlela.
Ngalimpelaviki, ikhansili ikhangelelwe ukuphatha imihlangano eGlen Norah, Avondale, Waterfalls, Hatfield, Mount Pleasant le Mabelreign ngoMgqibelo. NgeSonto imihlangano izaphathwa kusukela ekuseni endaweni ezigoqela iGlen View, Highfield, Mufakose, Dzivarasekwa kanye leMbare.