Imidlalo yenguqu yalonyaka eyesigaba se Castle Premier Soccer League eZimbabwe iqala ngoLwesihlanu kulomdlalo owodwa ozakuba khona phakathi kweqembu le Harare City leqembu elingene lonyaka esigabeni saphezulu ele Tsholotsho.
Amaqembu la womabili azakuba ngabaqali besiziba enkundleni yeRufaro kuthi ngoMgqibelo iqembu le FC Platinum lizadlala lele Dongo Sawmills ngase Mandava, ko Bulawayo iqembu le Chicken Inn lizangqikilana lele Flame Lily eLuveve, ngasesigodlweni iqembu le Dynamos lizemukela ele Buffaloes ngase National Sports Stadium, kuthi enkundleni ye Gwanzura iqembu le ZPC Kariba lizemukela ele Highlanders.
NgeSonto iqembu le Triangle lizadlala lele Hwange ngase Gibbo, kuthi ele How Mine lizatshayana lele Chapungu enkundleni yeLuveve kubesekusithi ele Whawha lizemukela ele Caps United enkundleni yeAscot.
Imidlalo eke yabakhona kungakaqali imidlalo yeligi ibe lezehlakalo zobudlwangudlwangu njalo umqeqetshi weqembu le Highlanders uBongani Mafu ukhuthaze abalandeli bomdlalo wenguqu ukuba bazibambe betshiyane lomkhuba lo.
Lonyaka amaqembu angene kusigaba se PSL evela ku Division One ngathi ele Tsholotsho, ele Hwahwa, ele Dongo Sawmills kanye lele Flame Lily njalo umqeqetshi weqembu le Tsholotsho uLizwe Sweswe uthi iqembu lakhe selihlome laphelela lilungela ukuba yilo elivula imidlalo yalonyaka.
Oqeqetsha abasakhulayo uCornelius Gumbo yena ongumlandeli weqembu le Highlanders uthi i Bosso isabumba kutsha iqembu layo yikho akalathemba lokuba ingaphakamisa isicoco seligi lonyaka.
Nyakenye iqembu le Dynamos yilo eliphakamise inkezo yePSL obekungokwesine iminyaka ilandelana ukuba leliqembu liphakamise lesisicoco.
Amaqembu agunyulwe kusigaba saphezulu nyakenye ngathi ele Black Rhinos, ele Shabanie Mine, ele Bantu Rovers kanye lele Chiredzi.