IDeMbare ilahle imiklomelo okwakuqala kusizini yalonyaka ngempumela yokuba ngutshiki lobhanqa leleCaps United. Intathelizindaba yeStudio Seven yezemidlalo uJoseph Njanji usiphe impumela yemidlalo eyesigabeni se Premier Soccer League edlalwe nngoMvulo enkundleni ezitshiyeneyo zakweleZimbabwe lezadlalwa kuyonale iviki.
Iqembu le Caps United libe ngutshiki lobhanqa lele Dynamos 1 ka 1 emdlalweni obusenkundleni ye National Sports Stadium esigodlweni iHarare okuyimpumela etsho ukuba iDeMbare ilahle imiklomelo okwakuqala kusizini yalonyaka njengoba phambilini kwalumdlalo ibinqobe kuyo yonke imidlalo emithathu ebisiyidlale kuligi.
IDynamos isilemiklomelo elitshumi ngemva kokudlala imidlalo emine okulinani elifana leleqembu le Triangle lona elinqobe iqembu le Dongo Sawmill nge 1 ka nya enkundleni yeVengere.
Kweminye imidlalo edlalwe namhlanje iqembu le Tsholotsho lisile ngesikhala senalithi ngemva kokuba umgadli walo uEriko Phiri ehlohle sekusele imuzuzu nje ukuba umdlalo ufike emaphethelweni emdlalweni walo leqembu le Hwange umklomelo wakhe wadala ukuba umdlalo uphele zingutshiki lobhanqa 1 ka 1 enkundleni ye White City.
ITsholotsho isilemiklomelo emine kuthi iqembu le Hwange selilemiklomelo emibili.
Umqeqetshi weqembu le Tsholotsho uLizwe Sweswe utshele intatheli ngemva komdlalo ukuba uyathokoza ngendlela abafana bakhe abaziphathe ngayo ngemva kokuhlohlwa liqembu le Hwange ngoba bengethukanga bacina labo behlohlile.
Emdlalweni obusenkundleni yeLuveve iqembu le Chicken Inn linqobe ele Whawha nge 2 ka nya njalo ohlohlele leliqembu nguEdmore Chirambadare obedlalela iqembu le Tsholotsho nyakenye.
Iqembu le Chicken Inn selilemiklomelo eyithoba munwe munye ngemva kokunqoba kwalo lokhu.
Kube lomdlalo owodwa namhla okungazange kube leqembu elenelise ukulitshayela emambuleni njalo lo ngobuphakathi kweqembu le Buffaloes lele Highlanders wona obusenkundleni yeVengere eRusape.
IBosso isilemiklomelo eyisikhombisa kuthi iBuffaloes isilemiklomelo emibili.
Umdlalo obekumele ube phakathi kweqembu le Chapungu lele ZPC Kariba awusadlalwanga ngoba inkundla ye Ascot ibigcwele amanzi ngemva kokuba kune izulu edolobheni leGweru.
Emdlalweni odlalwe ngeSonto enkundleni yeGwanzura iqembu le Flame Lily libe ngutshiki lobhanqa lele How Mine 1 ka 1 okuyimpumela etshiye iHow Mine ilemiklomelo emihlanu kodwa lleiqembu lilakho ukuphiwa eminye imiklomelo emithathu ngemva kokuba iqembu le Caps United lehluleka ukuzodlala lalo ngoLwesihlanu enkundleni yeLuveve.
NgoLwesithathu iqembu le FC Platinum lona elikhutshwe kumncintiswano we Caf Confederations Cup lizadlala lele Flame Lily ngase Mandava.