Imidlalo yenguqu kwele South Africa iya kukhefu elide iqembu le Kaizer Chiefs livule inkalakatha yesikhala phakathi kwalo lamaqembu ahlezi ngaphansi kwalo engalaneni yemiklomelo.
Elizweni le South Africa iqembu le Kaizer Chiefs liphutshe umnyaka lingazake lidliwe emidlalweni elitshumi lathoba minwe mbili eseliyidlale kusizini ka 2014/15 njalo likhokhela amaqembu angaphansi kwalo engalaneni yemiklomelo ngemiklomelo elitshumi lanhlanu.
Iqembu le Kaizer Chiefs lilemiklomelo engamatshumi amane lesithupha (46) kuthi ngemva kwalo kule Mamelodi Sundowns kanye le Bidvest Wits ezilemiklomelo engamatshumi amathathu lanye iqembu ngalinye.
Imidlalo yeligi kwele South Africa izaqhubekela phambili ngomnyaka ozayo ngemva komncintiswano wezwekazi lase Africa wona ozaqhutshelwa elizweni le Equatorial Guinea.
NgaseNgilandi iqembu le Manchester City selilingene ngemiklomelo leqembu elihlezi phezu kwengalane ele Chelsea womabili elemiklomelo engamatshumi amathathu lathoba munwe munye (39) kodwa iqembu le Chelsea lilakho ukuvula njalo isikhala nxa lingenelisa ukunqoba ele Stoke City namhla ebusuku.
Ngemva komdlalo lo ozakuba phakathi kwe Stoke le Chelsea imidlalo kweleNgilandi iyaqhubekela phambili ngosuku lwe Boxing Day.
Elizweni le Spain iqembu le Barcelona selitshiywa ngomklomelo owodwa liqembu elihlezi phezu kwengalane ele Real Madrid lona elilemiklomelo engamatshumi amathathu lathoba munwe munye (39) kodwa iqembu le Real Madrid lidlale imidlalo emilutshwane kuleqembu le Barcelona kungoba lona beliphatheke kumncintiswano we FIFA Club World Cup obuselizweni le Morocco.
Iqembu le Real Madrid yilo eliphakamise inkezo kulumncintiswano ngemva kokutshaya iqembu le San Lorenzo nge 2 ka nya ku final.
***********************************
Sikhangele umdlalo kakhilikithi;
Inhlanganiso ye Zimbabwe Cricket ikhangelelwe ukuba yethule kuzulu igama lomqeqetshi omutsha weqembu le sizwe ngemva kokukhutshwa esikhundleni kuka Stephen Mangongo ngeviki edluleyo.
UMangongo ulahlekelwe ngumsebenzi ngemva kokungaqhubi kuhle kweqembu le Zimbabwe emidlalweni eliyidlale elizweni lase Bangladesh njalo abasiki bebunda bathi inhlanganiso ye Zimbabwe Cricket ilakho ukukhetha phakathi kwabadlali abake badlalela iqembu lesizwe njalo amabizo asematheni abantu ngagoqela elika Murray Godwin kanye lo Alistair Campbell.
Umqeqetshi omutsha uza sekusele amaviki ambalwa ukuba iqembu le Zimbabwe liyephatheka kumidlalo yezizwe zomhlaba ezaqhutshelwa amazweni athi ele Australia kanye le New Zealand.