Uhulumende wakweleMelika usethembise eleZimbabwe izigidi zamadola ezilitshumi ukungezelela kumali ezaphathisa kunhlelo zokulwisana lendlala esitshiye inkulungwane zabantu zingelakudla.
Emkhosini owenzelwe emahofisini enhlanganiso ye World Food Program eHarare ngoLwesine, ummeli weMelika eZimbabwe uMnu. Harry K.Thomas Juniour, utshele iziphathamandla ezivele enhlanganisweni ezitshiyeneyo ukuba, lolusizo luzaqondiswa kulabo ababhekane lobunzima obukhulu bokuswela ukudla.
"Sibonga lolusizo olungezelela,uhulumende wakweleMelika uzimisele ukusebenzelana lalenhlanganiso ye World Food Programme,kunye lezinye inhlanganiso ukwanelisa ukutholisa lolusizo,ngokushesha kuzulu okudingayo".
Ugatsha lweMelika oluphathisa amanye amazwe, olwe U.S. Agency for International Development (USAID), luthi lwengezelele limali kusukela ngenyanga kaNhalangula nyakenye yafika kumadola ayizigidi ezingamatshumi amathathi lanhlanu yaphathisa abantu abazinkulungwane eziyisithupha. Loluncedo luza ngemva kokuba ilizwe libhekane lendlala ebangelwe yikonakala kwezilimo lokufa kwezifuyo.
Umqondisi we WFP eZimbabwe uMnu. Eddie Rowe uthi luyabongeka lolusizo njengoba lusiza ngesikhathi ilizwe lamanye amazwe akusigaba sangezansi yezwekazi ebhekane lendlala eyesabekayo embalini yawo lamazwe.
"Kodwa lunganeli lolusizo.Lapho sibona ukuba sitholisa usizo kulabo abaludingayo ngalesi sikhathi,kudinga ukuba siding indlela lokuluqeda loludubo kuzulu kusikhathi esizayo ngoba lezo zehlakalo zizokuba khona,ngenxa yenguquko esikhona kwezomumo womkhathi. Thina lezinye inhlanganiso ezitholisa usizo,sisebenza nzima ukudinga indlela,zokwenza ukuba abantu abayi 2,8 million elizweni".
Obona ngezokuqhutshwa kwenhlelo ze United Nations eZimbabwe, uMnu. Bishow Parajul ukhuthaze abezinye inhlanganiso ukuba baphathise labo ngosizo olufanayo.
Njengenhlanganiso ye UN,sisebenza lohulumende ukutholisa usizo oludingakalayo kuye wonke oludingayo,kungakhathalekile ukuba ungowaliphi ibandla lezombusazwe.
UMnu. Thabisani Moyo ingcwethi ebona ngezokudla enhlanganisweni ye USAID njalo engomunye wengcitshi ezikhangele kwezokuthi ilizwe lingathola kanjani ukudla.
"I five million yakhona izatholela abantu ukudla,kubuye njalo enye i five million yakhona siyosebenzisa,kunhlelo zokuzithuthukisa ezifana lokuyakhiwa kwamadamu kanye lamadibha loba izivande ezisetshenziswa yizakhamizi kulezi zigaba eziswela ukudla '.
Lolusizo uMoyo ethi luzaqhutshwa ngokusebenzelana kwabenhlanganiso ye USAID leye WFP.
"Ngingathi sisebenza kundawo ezinengi labe WFP,kodwa ke ukudla kwethu,ngikhangelele ukuba luzafinyelela amadistricts angaba litshumi lambili. Esigabeni semaNdebeleni,sikhona eMangwe,sikhona e Hwange, sikhona njalo e Binga.Sisebenza njalo endaweni zabo Mwenezi sibuye sibe khona eChipinge kanye laboTsholotsho".
Abe USAID bathi kulendlela ezizasetshenziswa ukuvimba ukungethembeki ekwabeni loluncedo ngemva kwemibiko yezehlakalo ezimbalwa.
Ukuphathisa lokhu kuzakwenziwa kulandelwa okwaphuma kunhlolisiso eyenziwa nguhulumende ngaphansi kohlelo lwe Zimbabwe Vulnerable Assessment Committee eyaveza ukuba emaphandleni phose abantu abayizigidi ezimbili ( 2,8 million ) bebhekane lobunzima bokusilela kokudla, okuyisilinganiso sokungamatshumi amathathu ekhulwini, 30 % .