Ibandla leMDC-T lithi iziphathamandla zalo zizavotelwa ngamalunga alelibandla emhlanganweni walo weCongress osekupheleni kwenyanga ezayo kulokuthi zikthethwe mahlayana ngumkhokheli walelibandla uMnu. Morgan Tsvangirai njengalokhu okwakufunwa ngabanye.
Lokhu kuvezwe yisikhulumi salelibandla uMnu. Douglas Mwonzora emhlanganweni lentathelizindaba eHarare ngemva komhlangano wogatsha lweNational Council yalelibandla eHarare lamuhla.
UMnu. Mwonzora wengezelele wathi amandla kanobhala jikelele walelibandla azancitshiswa, njalo akusoze kube labasekeli bakamongameli ababili ngoba kungancedisi lutho ubendleni.
Lokhu kwenzakala i--MDC-T ilokhu isaqhubeka ngokukhetha abazancintisa ezikhundleni ezitshiyeneyo kumhlangano we congress njalo kulimpelaviki uhlelo lolu lukhangelelwe ukuqhutshwa ezigabeni ezigoqela i-Harare, Chitungwiza, lakoBulawayo.
Umsekeli wesikhulumi salelibandla uMnu. Joel Gabhuza uthi abanye bebefuna ukuthi ikhomithi ye Standing Committee layo yesulwe ngoba ingadingeki, lanxa lokhu kungasaphumelelanga.