WASHINGTON DC —
Ibandla leMDC-Renewal ngoLwesihlanu lamukele amalunga amatsha koBulawayo, agoqela ummeli weMakokoba edale lephalamende uMnu Gorden Moyo.
Abanye ngabathi owake waba ngumeya wakoBulawayo uMnu Patrick Thaba Moyo, uMnu George Mkhwanazi, uMnu Cornelius Mubaiwa labanye.
Abane laba labanye, bethulelwe umphakathi yisiphathamandla zebandla eLarge City Hall koBulawayo.
UMnu Gorden utshiye isikhundla sokuba ngumgcinisihlalo weMDC-T koBulawayo kunyanga ezedluleyo esola ubukhokheli bukaMnu Morgan Tsvangirai njalo esithi lelibandla lisebenzisa udlakela.
Umgcinisihlalo weMDC Renewal uMnu Sam Sipepa Nkomo utshele lumsakazo ukuthi liqhubeka lithola usekelo olunengi ibandla labo.