Ukuxotshwa kukaMnu. Andrew Langa esikhundleni sokuba ngumphathintambo wezemidlalo lamasiko sekutshiye inengi lesigaba seMatabeleland South siphakathi kokudana.
ULanga umiswe ukuba lilunga leZanu PF okweminyaka emithathu nyakenye ngoba esetheswa icala lokusebenzelana lowayengumsekeli kaMongameli, uNkosikazi Joice Mujuru kodwa waqhubeka engumphathintambo.
NgoLwesithathu, uMongameli Mugabe ulobele incwadi usibalukhulu kahulumende,uMnu. Misheck Sibanda ukuthi azise uLanga ukuthi umsebenzi usuphelile kwahle kwafakwa uMnu. Makhosini Hlongwane esikhundleni lesi.
Inengi ngelithi uLanga, lanxa ubengasebenzi gadalala kugatsha lwezemidlalo ubengumuntu ophathisa uzulu wesigaba se Matabelelend South.
Ingcwethi ecubungula ezemidlalo oyintathelizindaba elodumo kwezemidlalo, lezokuzilibazisa, uEzra Tshisa Sibanda ngobunye wabagcizelela ukuthi uLanga ube lungele isigaba seMandebeleni kodwa kwezemidlalo laye bezimphica. NgoHlongwane uEzra uthi lanxa eke wasebenza laye njalo emhlonipha ekusebenzi kwakhe eseseyintathelizindaba lalapho esengene kwezombusazwe akaboni eletha umahluko kwezemidlalo eZimbabwe.
