Ugatsha olubona ngokubuthelela imali kahulumende, olwe Zimbabwe Revenue Authority (ZIMRA), luthi lwenelise ukubuthelela imali enenganyana lonyaka nxa kuqathaniswa lanyakenye ngemva kokuguqula indlela ebikade iyisebenzisa.
Umgcinisihlalo we board yeZIMRA, uNkosikazi Willia Bonyongwe, utshele intathelizindaba ngoMvulo ukuthi ugatshwa lwakhe lwenelise ukubuthelela imali eyedlula eyanyakenye ngamadola adlula izigidi ezingamatshumi amahlanu, i$52 million.
UBonyongwe uthe okunye okubangele ukuthi imali le ikhuphuke yikuthi lolugatsha lufake imigoqo ebamba ngamandla izisebenzi lamankampani ukuthi zibhadale imithelo njalo lwavala lezikhala ebezingenza kube lula ukuthi izisebenzi ze ZIMRA zenelisi ukutshontsha limali.
Ukuhlaziya loludaba sixoxe lengcwethi ecubungula ezomnotho welizwe, uMnu. Believer Mhlanga, othe udubo yikuthi imali enengi etholwa nguhulumende iphelela ekubhadeleni izisebenzi.
"Abantu bona laba abalutshwana abasebenzayo bayabhadala umthelo we Pay As You Earn, ikakhulu nxa sikhangele wona lawo ama civil servants in general lamanye ama companies," kutsho uMhlanga.
Kodwa uMhlanga uthi imali yomthelo othathwa emngceleni welizwe, owe customs duty ngesilungu, wehlile kakhulu.
