Izakhamizi zakoBulawyo ziveza imibono ehlukeneyo ngendlela ikhansili yalelo dolobho ecabange ukuthapha ngayo imibono kazulu mayelana leBudget yomnyakozayo ka2021.
Lonyaka ngenxa yeziqondiso zokumelana leCoronavirus ikhansili yaleli dolobho icabange ukusebenzinsa inkundla yokuxhumana ebulenjini eyeWhatsapp ukuxoxisana lozulu ngale ibudget.
Inengi lezakhamizi zakoBulawayo ikakhulu ezihlala emalokitshini bezikhala ngokuthi imibono yazo ayisoze izwakale, okuza kwenza zicine zikhulunyelwe ngabahlala emizini ehlala abalutshwana abalemali ngoba bethi kuyabiza ukuba sebulenjini.
Bathi njalo ukhansili akacaci ngokuthi imali yalonyaka isebenze njani, okugoqela lokuthi isikhathi abasinikeza uzulu ukuba atsho imibono yakhe silutshwana kakhulu.
UNkosikazi Cora Ndebele usola kabanzi lelinyathela ethi lipha uzulu isikhathi esincane njalo imali efunwa yikhansili bambalwa abazayenelisa.
“Isikhathi abasinikeze sona sincane ngoba abantu bakhulume kakhulu ngodubo lwamanzi lokudubuka kwempompi zamanzi kuthi sekukhulunywa ngebudget isikhathi siyabe sesiphelile. Inengi Labantu liyehluleka ukuphatheka kule imihlangano ngoba bayabe abanye besemsebenzini ngesikhathi befuna ukupha imibono yabo bayabe sebeyivalile inkundla yewhatsapp kungabakuhle babuthanise abantu njalo belandela imithetho yeCovid-19 lockdown ekuthapheni imibono kazulu ngendlela.”
Olwela amalungelo oluntu ongunobhala jikelele weIbhetshu Likazulu uMnu Mbuso Fuzwayo uthi luhlelo oluhle kodwa lulezikhubeko ezithile.
“Ibudget online emhlabeni ilungile kodwa kuleli akulula ngoba idata iyadula, okwesibili abanini bezindlu ngabantu asebebadala abangenelisi ukungena ebulenjini njalo ikhansili ayizange isazise ukuba imali yakuqala ka2020 bayisebenzise njani buye futhi ayisibobonke abazafinyelela ukupha imibono yabo ngoba labaqinileyo abalayo imali yokungena ebulenjini.”
Isakhamuzi sakoBulawayo, uNkosazana Winnie Moyo uthi ikhansili iyazama ukukhulumisana lozulu ngesikhathi seCovid-19 loba kungelula.
“Ngombono wami ikhansili izamile ukuthi bafinyelele emphakathini babutha izikhalazo zikazulu ngesikhathi secovid-19 ngoba asenelisi okwamanje ukuthi sihlangane njengezakhamizi. Sizabona ukuthi bazakwenzanjani ekulungisiseni izikhalazo abazithole kuzulu.”
UNkosikazi Otilia Sibanda isakhamuzi sikaWard 21 uthi ibudget le inzima kubantu abahlala esigabeni sakhe abakhulileyo ngoba abafinyelelanga ekupheni imibono yabo.
“Indlela ibudget ebhalwe ngayo kuzakubanzima ngoba uWard 21 kuhlala abantu asebekhulile ngabe ikhansili yenze imihlangano babahlalisa ngeziqa bengena bekhuluma. Kudaba lokuhlanza ampompi zamanzi sidinga indlela epermanent kwakhiwe amadamu njalo ibudget yehle ize kubantu abadala ngendlela efaneleyo.”
Abekhansili yedolobho lakoBulawayo bachaze ukuba kulandela iziqondiso zeCovid-19 lockdown bebengenelisi ukubuthanisa abantu njengeminyakeni kodwa bazazama ngokuya kwesikhathi uma kuzavuma ukuba babuthanise abantu bethaphe imibono yabo mayelana lebudget ka2021.
Ikhansili yona ithi ikhangelele ukukhuphula imithelo okumele ihlawulwe yizakhamizi isuka kumakhulu amabili letshumi lamadola -ZW$210 ngenyanga, isiya kunkulungwane eyodwa lengxenye-ZW$1 500.
Izakhamizi ezenelise ukungena ebulenjini zithi kazemukeli isilinganiso esikhwezwe ngaso ngukhansili, kuzaba nzima ukuhlawula ngoba lonyaka evele eyehluleka ukubatholisa amanzi ahlanzekileyo, ukubuthwa kwezibi njalo lempompi ezithwala amanzi engcekeza zihlala zidabukile.
