Abekhansili yakoBulawayo bamanyene, labekhomishini kahulumende ebona ngokuvuselelwa kwamaganga eyeForestry Commission, ukusungula uhlelo lokuhamba behlanyela izihlahla ezikolo emizameni yokumelana lokuguquka komumo womkhathi.
Abe Bulawayo City Council basungule lolu hlelo beqala ngokuhlanyela izihlahla esikolweni eseQueen Elizabeth Primary School, esisemzini oweNkulumane, NgoLwesibili, emkhosini ongenwe ngabafundi, ababalisi, izisebenzi zekhansili labeForestry Commission kwahlanyelwa izihlahla ezinhlanu.
Ekhuluma ngemva kokuhlanyela isihlahla seHabahaba esiyiso esihlanyelwa lonyaka, uKhansila KaWard 22 uMnu. Rodney Jele uchasisa abakwenze namhlanje.
“Silapha sinanza iTree Plnting Day, ngenxa yokuguquka komumo womkhathi kuqakathekile ukuba sihlanyele izihlala lapha eNkulumane njalo sihlanyele ihabahaba lezinye izihlahla.”
UMnu Mehluleli Mpofu uPrincipal Education Officer kukhansili yakoBulawayo ukhuluma ngokuqakatheka kokuhlanyela izihlahla.
“Isihlahla salonyaka ihabahaba siqakathekile, silokudla okunengi, kuqakathekile ukuhlanyela izihlahla, labantwabethu bayenelisa ukuthola izihlahla lobanje inengi lezihlahla sezitshabalala. Sikhangelele ukuhlanyela izihlahla ezidlula ikhulu, sesihlanganisa lezikolo izihlahla ezifika inkulungwane singazihlanyela.”
UMgcinisihlalo weQueen Elizabeth II Primary School Development Association uMnu Collen Moyo uthi ukhathazekile ngokuganyulwa kwezihlahla mahlayana.
“Siyabonga ngezihlahla elisiphathele zona sazihlanyela ngoba kuligceke lapha kwakungenje abantu bayagamula izihlahla mahlayana liphenduka lapha kuminyaka ezayo lizathola sekulezihlahla ezizasipha imithunzi lezithelo zisiseze njengesigaba.”
UNkosazana Nokuthaba Nyathi, oweForestry Commission koBulawayo uchaza indikimba yalonyaka.
“Isihlahla sethu seHabahaba yiso esihlanyelwa lonyaka njalo sihambelana lendikimba yethu eqakathekisa ukutholisa ukudla lokubamba ukugugudeka komhlaba.”
UMphathisikolo weQueen Elizabeth II, uMnu Marko Hleza uchasisa ukuthi bahlele ukuphatheka ngayiphi indlela kumkhankaso lo.
“Sikhangelele ukuhlanyela izihlahla ezidlula amatshumi amabili lobanje udubo lokusilela kwamanzi luzasikhama ngoba umgodi wethu awusakhuphi kuhle amanzi njengoba lisazi ukuba amanzi ekhansili asegavunwa.”
UNkosazana Petty Bhobho uEducation officer weBulawayo City Council uthi yonke le yimizamo yokumelana lokuguquka komkhathi.
“Sikhangelele ukuhamba sihlanyela izihlahla kuzozonke izikolo ezikoBulawayo sisebenzelana labeForestry Commission ngoba sikhangelane lokuguquka komumo womkhathi njalo labafundi bafundela phandle betshiswa lilanga kodwa singahlanyela izihlahla ukuze kuminyaka ezayo befundele ngaphansi komthunzi.”
Umhlaba jikelele unanza ilanga lokuhlanyela izihlahla minyaka yonke ngeviki yakuqala kaMpalakazi NgoMqgibelo okwenze lekhansili yakoBulawayo isebenzelane leForestry Commission ukuhlanyela izihlahla.
Indikimba yalonyaka yokuhlanyela izihlahla ithi “Trees and forests for ecosystem restoration and improved livelihoods”.
