Iqembu lomdlalo wenguqu ele Highlanders lithuthukise amathuba alo awokusinda ekugunyulweni esigabeni se PSL ngemva kokunqoba iqembu le Dongo Sawmill nge 2 ka nya ngeSonto.
Iqembu le Highlanders likhuphule inani lemiklomelo elilayo laya kumatshumi amathathu lanye (31) ngemva kokunqoba kwalo ele Dongo Sawmill kodwa liyale lilokhu likundawo yetshumi engalaneni yemiklomelo.
Phezu kwengalane kuhlezi iqembu le Chicken Inn lona eselilemiklomelo engamatshumi amahlanu lanye (51) ngemva kokunqoba ele How Mine nge 2 ka 1 ngoMgqibelo kuthi ngemva kwalo kuleqembu le FC Platinum elilemiklomelo engamatshumi amane lathoba minwe mbili (48).
Iqembu le Dynamos elihlezi kundawo yesithathu libe ngutshiki lobhanqa leqembu le Harare City kungela qembu elenelise ukulitshayela emambuleni okutsho ukuba selitshiywa ngemiklomelo eyisithupha liqembu le Chicken Inn.
Kundawo yesine kuleqembu le Triangle lona eliqhuba nzima kulezinsuku njalo eliyale lilokhu lilemiklomelo engamatshumi amathathu lathoba minwe mbili (38) ngemva kokudliwa nge 3 ka nya liqembu le Flame Lily ngeSonto.
Kundawo ezine ezingaphansi kwengalane kutholakala amaqembu athi ele Tsholotsho lona elilemiklomelo engamatshumi amabili lantathu (23), ele Flame Lily elimiklomelo engamatshumi amabili lambili (22), ele Whawha elilemiklomelo engamatshumi amabili (20) kuthi emsileni kuleqembu le Dongo Sawmills elilemiklomelo elitshumi lathoba minwe mbili.
.....................................................
Kulimpelaviki amanye amazwe akuzwekazi lase Africa abephatheke kumidlalo eyokudinga amazwe azakuyaphatheka kumidlalo yezizwe zomhlaba ezaqhutshelwa elizweni le Russia ngomnyaka ka 2018 okungumkhankaso ilizwe le Zimbabwe elamiswa ukuphatheka kuwo ngoba lilesikwelede somqeqetshi oyisizalwane se Brazil uValinhos.
Kuzwekazi le Europe khona amazwe aphakathi komhaso wokudinga amazwe azakuyadlala kumncintiswano we Euro 2016 ozadlalelwa elizweni le France njalo amazwe asephumelele ngathi ele Germany, ele Poland, ele Albania, ele Romania, ele Wales, ele Belgium, ele Italy, ele Austria, ele Czech Republic, ele England, ele Iceland, ele Northern Ireland, ele Portugal, ele Spain kanye lele Switzerland.
.....................................................................
Sikhangele ezinye indaba esingasizo ezomdlalo wenguqu.
Iqembu elimela ilizwe le Zimbabwe emdlalweni kakhilikithi linqobe ele Ireland kumidlalo eyohlobo lwe One Day International ngemva kokunqoba ngama wickets amahlanu emdlalweni wesibili phakathi kwalawa maqembu oqhutshelwe enkundleni ye Harare Sports Club ngeSonto.
Iqembu le Zimbabwe linqobe ngama wickets amabili emdlalweni wakuqala obekhona ngoLwesihlanu okutsho ukuba umdlalo wesithathu njalo ungowokucina ozadlalwa kusasa awusaqakathekanga kangako.
......................................
Imidlalo ye Rugby World Cup eqhutshelwa elizweni lase Ngilandi kulezinsuku isifike kuhlandla le quarter final njalo amaqembu
afinyelele kulesisigaba ngathi ele South Africa lona elizadlala lele Wales, ele New Zealand lona elizadibana lele France.
Yomibili limidlalo izadlalwa mhla zilitshumi lesikhombisa kuyonale inyanga ikanti ngosuku olulandelayo iqembu le Ireland lizangqikilana lele Argentina kuthi ele Australia lona lizadlala lele Scotland.
