Solubaphuzele ukufika usuku lwangeSonto abalandeli bomdlalo wenguqu lapho okuzadibana khona iqembu leHighlanders lele Chicken Inn kuFinal yenkezo ye Easycall Cup.
UMacloud Moyo ngumsekeli omkhulu oweqembu leChicken Inn ongaswelakaliyo enkundleni nxa leliqembu lidlala. Kuthe lalapho abadlali baleliqembu sebephiwa imendulo zokuba zintshantshu zalonyaka kusigaba se PSL laye wayithola eyakhe.
Umfoka Moyo ozibiza ngegama lokusoma elithi Macloud Moyes uthi yena iqembu le Chicken Inn ngeSonto lizaphakamisa njalo inkezo ye Easycal n gemva kokunqoba ele Highlanders.
Umfowabo ka Macloud uMbonisi Ndlovu yena ongumsekeli weqembu le Highlanders uthi abafana be Bosso kuzamele bebophe ziqine ngeSonto njengoba bezadibana leqembu elisanda kuphakamisa isicoco seligi.
Iqembu le Chicken Inn belizithaphuzela kuqembu le Highlanders kumasizini amabili edluleyo njengoba lonyaka iqembu le Chicken Inn linqobe eleBosso nge 2 ka 1 emdlalweni wakuqala oweligi kwathi kowesibili lanqoba njalo nge 3 ka 2.
Nyakenye iqembu leChicken Inn linqobe kumdlalo owodwa kwathi omunye uphele zingutshiki lobhanqa.
Limbali yiyo edala ukuba umlandeli weqembu le Chicken Inn u Bronnie Makhalima ethi iqembu lakhe lizakhulela eleBosso laku final yenkezo ye Easycall.
Ubaba uClever Somumbu Mpofu ngumsekeli weqembu le Highlanders, njalo uthi yena leliqembu kumele linqobe ngeSonto ukuze liqede umnyaka lilelikuphetheyo ngemva kokuqhuba kwalo nzima kumidlalo ye PSL.
Iqembu elizanqoba ngeSonto lizathola inkulungwane ezingamatshumi ayithoba minwe mbili ($80 000) kuthi elizadliwa lizathola inkulungwane ezingamatshumi amahlanu ($50 000).
Abadlali beqembu le Highlanders abathi u Erick Mudzingwa kanye lo Obidiah Tarumbwa kabasoze bephatheke kumdlalo wangeSonto ngoba bejeziswa yinhlanganiso ye PSL ngemva kokuba betshengiswe ikhasi lombala olithanga kabili emidlalweni edluleyo.