Amaqembu omdlalo wenguqu athi ele Highlanders lele Chicken Inn yiwo azadibana kufinal eyenkezo yeEasycall ngemva kokuphumelela kwawo emidlalweni ye semi-final edlalwe ngempelasonto edluleyo.
Iqembu le Chicken Inn lifinyelele kufinal ngemva kokubhaxabula ele Caps United nge 3 – 0 ngoMgqibelo enkundleni ye Barbourfields.
Lumdlalo ubelobudlwangudlwangu obuhlasimulisa umzimba njengoba abasekeli beqembu le Caps United betshengise ukungaziphathi omunye wabo waze wangena enkundleni wakhahlela umdlali we Chicken Inn qede wabaleka.
Abalandeli beqembu le Caps United baqale ukujikijela amambodlela lezigubhu betshaya unozinti weqembu le Chicken Inn uElvis Chipezeze ngemva kokuba iqembu labo selihlohlwe kathathu.
Kuthe sekusele imizuzu embalwa ukuba umdlalo ufike komlindi uyacina abalandeli beqembu le Caps bajikijele ngamandla besola ukuba unompembe uMasakadza Makonese utshaye indiva ukuwa komgadli waleliqembu uAntonio Fuga phakathi kwe penalty box ye Chicken Inn kwahle kwaba yikho ukuphela komdlalo.
NgeSonto iqembu le Highlanders litshaye ele Dynamos nge 2-1 njalo omunye wabaqeqetshi beqembu le Bosso uCosmas Zulu utshayele ihlombe abalandeli balo ngokusekela abakwenze ngeSonto.
Umgadli weqembu le Highlanders uKnox Mtizwa, onguye ohlohle igoli lesibili izolo, uthembise ukuba iqembu le Chicken Inn lizakubona okukhulu mhla lawa maqembu edibana kufinal ngempelaviki elandelayo.
*******************************
Kusenjalo abalandeli bomdlalo wenguqu basele bebambe owangaphansi ngokumangala ngemva kokukhethwa kuka Philip Chiyangwa ukuba ngumongameli omutsha wenhlanganiso ye Zifa.
UChiyangwa uthole amavoti angamatshumi amane (40) kwathi uTrevor David Carelse – Juul wathola amavoti alitshumi lantathu (13), ikanti uLeslie Gwindi uthole amavoti amabili kuthi uJames Takavada uthole ivoti elilodwa zwi.
Umlandeli womdlalo wenguqu uReason Moyo uthi uChiyangwa akalalo ulwazi olokukhokhela umdlalo wenguqu.
Abakhethwe ukuba ngamalunga eboard yeZifa ngabathi uPiraishe Mabhena, uEdzai Kasinauyo, uFelton Kamambo kanye lo Philemon Machana.