Abaqhuba ucwaningo lwezokudla langesimo somkhathi abeFamine Early Warning Systems Network, i-FEWS Net, bathi imizi eminengi esemazweni angezansi yezwekazi le-Africa egoqela eleZimbabwe, kayisela kudla okweneleyo ngenxa yesomiso esikhulu esidalwe yisikhudumezi somkhathi ese-El Nino.
Ithi sokuphelile okwavunwa lonyaka ngakho-ke abantu kabasatholi ukudla okweneleyo ngelanga emazweni afana leZimbabwe, Zambia lamanye.
IFEWS Net ithi abalezifuyo labo sebeqalile ukuzithengisa ngenxa yokuswelakala kwamadlelo kanye lamanzi. Izifuyo lezi sezithengiswa ngemali ephansi kakhulu.
Linhlanganiso ikhuthaza ohulumende, abaphathisayo labanye ukuthi baphangise ukubuthanisa usizo lwabalambayo njengoba bebanengi abadinga ukudla lonyaka kuze kuyefika ekuqaleni komnyaka ka2025.
Inhlanganiso ephathisa ngokudla eyeWorld Food Program layo ithi ayikenelisi ukubuthanisa imali edlula izigidi ezingamakhulu amane amadollar eMelika - US$400 million eyokuphathisa abalambayo emazweni ayisikhombisa asezansi yezwekazi le-Africa.
Ithi okwakhathesi isibuthanise imali eyisilinganiso sokungamatshumi amabili ekhulwini, i-20% kuleyo edingakalayo.
Uhulumende weZimbabwe uthi unike abantu ukudla abedlula kancane izigidi eziyisithupha - 6.1 million kunyanga ezintathu ezedluleyo.
Umkhokheli wenhlanganiso elwela amalungelo abathengi eyeNational Consumer Rights Association uMnu Effie Dlela Ncube uthi ohulumende kumele bafake eceleni imali zokuphathisa abalambayo bake bame ukwenza ezinye izinto eziqeda imali.
Forum