Umpathintambo wezemali , umnumzana Patrick Chinamasa uthi udaba lwesimo somnotho weZimbabwe kalusoze lwahluzwa emhlanganweni phakathi kwenhlanganiso eziphathisa amazwe womhlaba ngemali, iWorld Bank leIMF ozaqhutshelwa eWashington DC eMelika kuyonale iviki.
Lokhu kwenzakala lanxanje yena lequla alikhokhelayo libuyile emhlanganweni lo. UChinamasa uthi limihlangano yenziwa minyaka yonke ngenhloso yokuhlaziya ukusebenzelana okwenziwa yi iWorld Bank kanye leIMF lamazwe womhlaba ngakhoke akula okutsha kulokhu.
Uqhubeke ethi abantu bavame ukuba lemicabango etshekileyo yokuthi nxa amazwe asathuthukayo esiza emihlanganweni enje okugoqela ele Zimbabwe ayabe ezocela imal sikhathi sonke. Lokhu uthi akunjalo ngoba kayisikho abakulandayo kule imihlangano, kodwa ukuzophana amacebo kwesokuthuthukisa umnotho wamazwe abo.
Ucine esola amazwe athuthukileyo okugoqela eleMelika ngokufakela eleZimbabwe izijeziso zenotho eziyizo athi zibangela ukugugudeka komnotho walelo lizwe kanye lokuphazamisa inthuthuko yayo.
Umumo wenotho eZimbabwe laloba uke wangani uyathuthuka eminyakeni ilizwe libuswa nguhulumende womanyano, ngokubuyela embusweni kweZanu PF iyodwa sokuhle kwaphazamisa intuthuko yeotho le.
Esekhuluma ngodaba lwedollar leZimbabwe ukuba kambe lingaphenduka na? uChinamasa uthe ilizwe lizaqhubeka lisebenzisa idollar leMelika ngoba ukuyekela ukulisebenzisa okwamanje kungaphazamisa amabhizimusi amanengi elizweni laphandle kwelizwe.