Umthethwandaba waphezulu elizweni owe Zimbabwe Constitutional Court ulahle udaba olukhwezwe ngabomanyano we MDC Alliance, lokuphikisa impumela yokhetho lukamongameli olwenziwe mhla ka 30 Ntulikazi lapho abe khomishini ebona ngezokhetho eye ZEC bethe uMongameli Emmerson Mnangagwa umkhokheli we Zanu PF nguye onqobileyo.
Esethula isinqumo sakhe emthethwandaba waphezulu oweZimbabwe Constitutional Court NgoLwesihlanu, uJustice Luke Malaba unqume esekela okwethulwe ngabekhomishini yeZEC ukuthi uMongameli Emmerson Mnangagwa nguye onqobileyo.
Abe Mdc Alliance bakhweze loludaba emthethwandaba we ConCourt befuna kwenziwe okukodwa phakathi kokuthathu okubalisa ukuba ingaze yemukelwa limpumela yabe khomishini ye ZEC, ukuphindwa kwalo loba ukubetha umnumzana Nelson Chamisa ukuba nguye onqobileyo.
uChief Justice Malaba uthi bathethe lesi sinqumo ngemva kokunanzelela ukuba abukho ubufakazi obaneleyo kudaba olukhwezwe ngabe MDC Alliance.
Kusenjalo omunye wabancintisa kukhetho lokudinga umongameli, umnumzana Peter Harry Wilson owe Democratic Opposition Party obesemthethwandaba laye, uthi asimangalisi sinqumo esethulwe ngu Justice Malaba.
Lesi sinqumo esethulwe ngumthethwandaba we Constitutional Court sisitsho ukuba umongameli Emmerson Mnangagwa sekuzamele agcotshwe phakathi kwensuku ezimbili.
Abe MDC batshele intathelizindaba ukuba sebezosebenzisa ezinye indlela ukutshengisa ukukhonona kwabo phezu kwaloludaba lokuqilibezelwa kukhetho lukamongameli njengoba eyokuya emthethwandaba isihle yaphelela lapha.
Kodwa bathi khona bezokwazisa abalandeli balelibandla ngemva komhlangano ozongenwa yinkokheli ye MDC ye National Council ngolweSithathu ngeviki ezayo ukuthi manyathela banzi abazawathatha.
