Ikomidi kahulumende weMelika ebona ngobudlelwano balelilizwe lamazwe eAfrica izahlangana ngeviki ezayo ihlaziya umumo wezombusazwe kanye lamalungelo oluntu eZimbabwe.
Lokhu kwenzakala ngesikhathi iMelika isithi ikhathazekile ngokwehluleka kweZimbabwe ukuhhlonipha amalungelo oluntu lentando yeningi.
Umsekeli kamabhalane obona ngobudlelwano beMelika lamazwe eAfrica uDr Shannon Smith, obekuqula elethekelele eZimbabwe kumaviki amabili edluleyo, uthi akula nguquko esithe yabakhona kundaba zamalungelo.
Ngalokho, uthi asikafiki isikhathi sokuthi eleMelika livuselele ubudlelwano balo leleZimbabwe.
Ekhuluma leStudio 7, uSmith uthe njalo iMelika iphatheke kabi ngokunyamalala kukaMnu Itai Dzamara yena othunjwe ngabantu abanakanelwa ukuthi ngabacuphi bakahulumende weZanu PF kunyanga ezintathu ezedluleyo njalo olokhu engazakali ukuthi ungaphi.
USmith wethekelele eHarare lomsekeli kamabhalane wezamalungelo oluntu uMnu Steven Feldstein, bahlangana leziphathamandla zikahulumende, ezamabandla aphikisayo kanye labenhlanganiso ezizimeleyo.
Lanxa iMelika iqina ngokuthi izijeziso eyazethesa eleZimbabwe zizaqhubeka, osomabhizimusi balelilizwe bazakwethekelela eZimbabwe ngeviki ezayo ukuyadinga amathuba okuvula amabhisimusi.
Ingcwethi kwezombusazwe uDr Nkululeko Sibanda uthi osomabhizimusi beMelika baya eZimbabwe belungiselela ukuvula amabhizimusi nxa iMelika isithe yavuselela ubudlelwano bayo leZimbabwe.
Umsekeli webandla leZanu PF uMnu Morris Ngwenya uthi kunzima ukuthi iMelika idlelane kuhle lohulumende kaMongameli Mugabe ngoba engayisiso sikhothamathe.
Kodwa uDr Sibanda uthi kunzima ukubana uhulumende kaMugabe ehloniphe amalungelo oluntu ngoba ibandla leZanu PF lilibandla lodlakela.
NgoLwesithathu ikomidi yeCongress yeMelika ekhangelane lobudlelwano beZimbabwe lamanye amazwe izahlayisa umumo weZimbabwe kanye lekusasa lobudlelwano phakathi kwamazwe womabili.
