Bathwele nzima ngokulwisana le Covid 19 emaphandleni. Bathi bethuswa yikubhubha komuntu obehlala eMhondoro obulewe ngumkhuhlane weCOVID-19 ngeviki ephelileyo.
Sebedlela evalweni besithi umkhuhlane lo ulakho ukumemetheka ngesiphangiphangi emaphandleni ngenxa yendlela abaphila ngayo.
UMnu. Painos Sikhosana, ohlala eZhombe eNkabazwe, uthi okunye okwenza abantu bengalandeli iziqondiso zohlelo lokuhlala ezindlini olwaziwa ngokuthi yi-lockdown, yikuthi kulabanye abelusa inkomo okumele bazikhangele sonke isikhathi.
“Lapho esibuthana khona sisikha amanzi ezibholaneni abantu kabalandeli iziqondiso ze lockdown. Imihlangano ilokhe ikhona abantu kabananzi ukuba bezifikele kugcikwane le corona”
Omunye njalo ohlala esiqintini seSidakeni eZhombe, uMnu. Zamani Tshuma, uthi okunye okwenza ukuthi bengalandeli iziqondiso zohlelo lolu yikuthi izibhedlela zikhatshana lemizi yabo.
“Sinanzelela ukuthi labo abagulayo akuselazimota ngoba izibhedlela zethu zikhatshana kakhulu. Lokhu sokuletha udubo lapho esihlala khona. Abantu baqhubeka bebuthana ezitolo”
Lokhu kusekelwa nguNkosikazi Nompilo Tshabalala, ohlala eNyamandlovu esabelweni seMatabeleland North, othi bayalamba ngesikhathi kuqhutshwa uhlelo lolu.
“Lapha sithwele nzima ngendlala. Sitshona ezindlini thina sizigulela. Indlala isithwalise nzima lezibhedlela akula, uyahamba kuthiwe akula mithi.”
Omunye njalo ohlala eNyamandlovu, uMnu. Zibuyile Nkomo, uthi bahlutshwa yikudla lamanzi.
“Sithwele nzima. Akula transport yokuya lapho okudingwa khona ukudla. Lendlala lonyaka izulu lisibulele. Kumele siyedinga ukudla koBulawayo, amanzi sithatha kuGwayi. Inkomo zinathana khonapho, lathi sinatha khonapho.”
Kulabanye abakhala ngokuswela ulwazi ngomkhuhlane weCOVID-19. Omunye wabo nguNkosikazi Sazini Maphosa ohlala eManama esabelweni seMatabeleland South.
“Siphila nzima uyazi, abantu balapha bayaphithizel asazi kumbe sizabulawiswa ngabantu botshwala. I grocery kayithengekei. Ukutshona endlini, ngingene ngiye engadini ngitshibilike, akupheli okuyinto lokhu kumele abantu bafundiswe.”
Ingcwethi kwezombusazwe, uMnu. Discent Collins Bajila, uthi uhulumende kumele asebenzise indlela ezikhona ezibalisa amaVillage Development Commitees lama village health workers ukwenzela ukwethulela abantu ulwazi ngalumkhuhlane.
“Kuyadanisa kakhulu ukuzwa ukuthi umkhuhlane weCoronavirus usufikile emaphandleni. Uhulumende kumele azame ukuthumele uukuthu avuselel uhlelo lwama village health workers, nxa bengasetshenzwanga labo abantu bazaphela”
UMnu. Believe Gaule okubandla leZanu PF uthi uhulumende uzama ukulungisa konke okuhlupha abantu.
Akwaziwa ukuthi kuzakwenzakalani umkhuhlane lo ungamemetheka emaphandleni kwele Zimbabwe.
