Iqembu le Chicken Inn yilo elihlezi phezu kwengalane yemiklomelo ngemva kwemidlalo yeviki yetshumi kusigaba se Premier Soccer League.
Lidla amahabula iqembu le Chicken Inn lonyaka njengoba lithe ngokunqoba kwalo ele Highlanders nge 2 ka 1 ngoMgqibelo enkundleni yeBarbourfields lakhuphuka layahlala phezu kwengalane lilemiklomelo engamatshumi amabili lantathu.
Iqembu elingene kumidlalo yangempelaviki lihlezi kundawo yakuqala ele Triangle lona lihlangane lembila zithutha enkundleni yeMandava lapho elinqotshwe khona nge 3 ka 2 ngele FC Platinum okutsho ukuba lehle layahlala kundawo yesibili lilemiklomelo engamatshumi amabili.
Kundawo yesithathu kuleqembu le Dynamos lona elinqobe ele How Mine nge 1 ka nya ngeSonto Emagumeni lalo lilemiklomelo elingana leye Triangle kodwa lona lihlezi kundawo yesithathu ngoba iTriangle ihlohle kanengi.
Iqembu le Chapungu lihlezi kundawo yesine lilemiklomelo elitshumi lathoba minwe mbili ngemva kokunqoba elikwenze ele Caps United nge 2 ka nya ngeSonto kuthi kundawo yesihlanu kuleqembu le How Mine elilemiklomelo elitshumi lanhlanu.
Kundawo yesithupha kuleqembu le ZPC Kariba lona elilemiklomelo elitshumi lane njalo lilingene ngemiklomelo lamaqembu athi ele Harare City kanye lele Highlanders.
Iqembu le FC Platinum lihlezi kundawo yethoba munwe munye lilemiklomelo elitshumi lantathu okulinani elilingana leleqembu le Caps United elikundawo yetshumi lona elilandelwa ngele Hwange elilemiklomelo elitshumi.
Kundawo yetshumi lambili kuleqembu le Tsholotsho elilemiklomelo eyithoba munwe munye okulinani elifana lalelo elilamaqembu ahlezi ngaphansi kwalo athi ele Flame Lily kanye lele Buffaloes.
Kundawo yesibili usuka ngaphansi kuleqembu le Whawha elilemiklomelo eyithoba minwe mbili kuthi iqembu elijeke amanye engalaneni ngeleDongo Sawmill lona elilemiklomelo emine.
...................................................
Kolunye udaba olumayelana lomdlalo wenguqu;
Inkokheli zomdlalo wenguqu elizweni ngoMgqibelo zitshayise unyawo obengumongameli wenhlanganiso ye Zifa uCuthbert Dube njalo obengumsekeli wakhe uOmega Sibanda nguye osephethe lesosikhundla.
Lokhu kwenzakale emhlanganweni oqhutshelwe esigodlweni iHarare njalo ongenwe ngabameli bezigaba abangamatshumi amathathu phakathi kwamalunga afika phose amatshumi ayisithupha abumba iZifa Council.
Ukumiswa kwe Zimbabwe ukuphatheka kumidlalo yezizwe zomhlaba yinhlanganiso yeFifa ngenxa yesikwelede somqeqetshi oyisizalwane se Brazil uValinhos kanye lezinye izehlakalo zokumangalelwa kwe Zifa yilabo ebekweledayo ngezinye zezizatho zokuxotshwa kuka Dube labanye bakhe abagoqela uTawengwa Hara kanye lo Fungai Chihuri.
Kusenjalo iqembu elimela ilizwe emdlalweni kanobhutshuzwayo liqale kuhle kumncintiswano oqhutshelwa elizweni le South Africa owe Cosafa Senior Men’s Championship lapho elinqobe khona ele Mauritius nge 2 ka nya.
Abahlohlele iqembu le Zimbabwe ngu Carlos Rusere lo Ronald Chitiyo.
Limpumela itsho ukuba ele Zimbabwe yilo elihlezi phezu kwengalane eyesibaya sika Group A ilemiklomelo emithathu kuthi ngaphansi kwayo kuhlezi amaqembu athi ele Namibia kanye lele Seychelles wona alomklomelo owodwa ngalinye ngemva kokuba etshayane aze abhekana kungela qembu elenelise ukulitshayela emambuleni.
Ngaphansi kwengalane kuhlezi iqembu le Mauritius elingela mklomelo.
Elizweni le Spain iqembu le Barcelona liphakamise isicoco seligi ngemva kokunqoba elikwenze iqembu le Atletico Madrid nge 1 kanya ngeSonto.
Limpumela itshiye iqembu le Barcelona lilemiklomelo engamatshumi ayithoba munwe munye lantathu njalo litshiya ele Real Madrid ngemiklomelo emine kusele umdlalo owodwa ukuba imidlalo ifike komlindi uyacina.
Lokhu ngokwesihlanu phakathi kweminyaka eyisikhombisa ukuba iqembu le Barcelona liphakamise inkezo yeligi elizweni le Spain.
………………………………….
Sikhangele umdlalo kakhilikithi;
Iqembu elimela ilizwe emdlalweni kakhilithi lizakuyaphatheka kumidlalo eyohlobo lwe Twenty20 emibili lemithathu eyohlobo lwe One Day Internatioal ezaqala ngoLwesihlanu elizweni le Pakistan loba nje inhlanganiso elawula inhlanganiso zemidlalo elizweni eye Sports and Recreation Commision ibilaye ukuba leliqembu lingayi ngenxa yokulwisana okuselizweni lelo.
Iziphathamandla zelizwe le Pakistan zibikwa zithembise ukuba iqembu le Zimbabwe lizavikelwa kanzima ngesikhathi likulelo lizwe kodwa inhlanganiso ye Zimbabwe Cricket yona ilobelane izivumelwano labadlali ezokuba kuyabe kungasiwo mlandu wayo nxa bengavelelwa yingozi.
Inhlanganiso ye International Cricket Council yalile ukuthumela onompembe kuleyo midlalo okutsho ukuba izalawulwa ngabonompembe abayizizalwane ze Pakistan.