Icala eletheswa ibandla leMDC-T, lokuthatha impahla lingabhadali lingene kulanga lokucina lapho osenzikini yalindaba uMnumzana Eddie Cross obekumele azokupha ubufakazi angabuyanga kodwa igqwetha likamamangala lithi alikhangelelanga ukuthi lokhu kuphambanise udaba lwabo.
Umnumzana Richard Fitches igqwetha elimele amankampani eCabat Trade and Finance le Security Mills, uthi lanxa uMnumzana Cross engabuyanga ngemva kokuthi bamthumele incwadi besithi azokupha ubufakazi, uyathemba ukuthi ingwalo akade elazo labonobu ubufakazi ababubeke phambi komthethwandaba buzenela ukuthi banikwe imali yabo yilelibandla.
Umamangala uthi yena uMnumzana Cross wayevele esaziwa njengelunga lekhomithi ephezulu yebandla leli kungakho bebengeke bathandabuza lapho esiza ukuthi ummele lelibandla.
Ngemva kwalokhu, umthethwandaba uzwe ubufakazi beMDC T buvela kumphathisikhwama, uNkosikazi Teresa Makone.
Ekhuluma kudale leli uNkosikazi Makone uthi yena ngalesisikhathi wayekukhomithi ekhangela ezemali eyiyo eyayisitsho ukuthi kuthengweni kodwa loludaba abazange baluphathe athi kuveza ukuthi abamnumzana Cross loSimon Spooner babengamelanga ibandla. Ethi kwakuvamile ukuthi kubelamaqembu abasekeli ayethengela ibandla impahla akholwa ukuthi yikho okwenzakala kuloludaba.
Isakhamuzi, uNkosikazi Mabel Ndimande, uthi yena ubuhlungu ngaloludaba ngoba manengi amankampani avale kulelidolobho ngenxa yokungabhadalwa okuzwisa ubuhlungu nxa kwenziwe libandla elikhulu njengaleli njalo elithi limela izisebenzi.
Esinye njalo isakhamuzi, uNkosazana Sikhangele Hadebe, uthi yena abantu kabehlise umoya bamelele ukuthi umthethwandaba wenze isinqumo njengoba kuyiwo osuzwe ubufakazi bonke.
Udaba lolu luqale emthethwandaba ngoLweSithathu lapho ibandla eleMDC T elithi lona alizange lingene kusivumelwano lesi sokuthola impahla phose izigidi ezinhlanu zamaRand – R 4 965 723 kumankampani la.
Limpahla eyathathwayo, yayigoqela izikipa, amaqhiye kanye lamalembu okuthandela, ayezasetshenziswa ukukhankasa kukhetho lomnyaka ka2008.
Umahluli uJudge Maxwell Takuva, unike amagqwetha womabili amaviki amathathu ukuthi alethe ingwalo zokuvala udaba lolu anduba aphe isinqumo. I MDC T yona imelwe nguMnumzana Douglas Mwonzora.