Induna sezikhuthaze uzulu emaphandleni ukuthi abelane ngokulingeneyo ukudla okuvela kuhulumende ukuze kungabikhona ozabulawa yindlala. Udubo lwamanzi kanye lokuswelakala kwamadlelo ezifuyo ngokunye osekutshayisa izakhamizi amakhanda.
Lanxa uhulumende sesungule uhlelo lwesiphala senkosi lapho induna lazo ezizabela uzulu oswelayo ukudla inengi lezakhamizi zithi lokhu kudla kakweneli uzulu olamabayo. UNkosikazi Eunice Moyo oyisakhamuzi seNsimbi eGaranyemba uthi baphakathi kwendlala enkulu.
“Indlala inengi ekhaya abantu siyalamba, lamanzi vele akula siphila nzima lenkomo sezisifa akula tshani kuwomile, abantu siyalamba okunye okumamngalisayo. Umumbu siphiwe nje khathesi abanye sitholile abanye kabatholanga susithi khonokho okuphiweyo lawe ucuphele umakhelwane ngoba kunzima ukuthi udle omunye wakho engela kudla.”
UMnu. Khumbulani Moyo ohlala esigabeni lesi uthi labatwana besikolo bathwele nzima ngendlala.
“Indlala ibhahile uze uzwele umntwana esiya esikolo ekuseni umbona ehamba enunubele uze uphose umbuze ukuthi wanunubala kuhamba njani. Impendulo yikuthi angidlanga lutho kungakho nxa umntwana esiya esikolo engadlanga kutsho lezifundweni ecine engafunda kuhle ngoba uyabe ebulawa yindlala.”
Ekhuluma ngesikhathi kugcotshwa induna uKwagatalala eMawaza induna yeMatshetsheni uMnu. Mbiko Masuku ukhuthaze uzulu ukuthi anakekelane ngalesisikhathi sendlala.
“Nxa udinga indawo yokulala kuqala kwakuthiwa uqale uzwe umsindo ungezwa abantwana bebanga umsindo susazi ukuthi basuthi lawe uzaphekelwa khathesi kukhangelwa izinja, ungabona izinja zicakile dlula uyephambili, konke lokhu kwenziwa ngumumo esikiyo owendlala kuyadingeka-ke ukuthi sisondelelane sibe seduze duze sonke sincedisane.”
Inkokheli yezinduna uMtshane Khumalo uthi uhulumende sengeze ukudla okuphiwa uzulu ukuze kulwisane lendlala.
“Phezulu kwalokhu elikuncediswa ngakho ngabe social welfare unika amasaka angu100 iward ngayinye ngohlelo lwesiphala senkosi. Liqala ngabantu abaswelayo mhlawumbe abangangenanga kusocial welfare lemuli lapho abantwana abahlala bodwa lezigoga.”
Uphinde waxwayisa abanye bakhe ukuthi bazabotshwa nxa bengaphambula lokhu kudla.
“Kasomumbu okumele uyegcinwa emzini weNduna kumele uye eziswini zabantu abalambayo, kungathi umumbu uzonceda abantu abalambayo thina sesiqoqoda ijele sesiwuthengisile kumbe sesinike abemuli kuphela singasaniki labo okuthwe sibanike, asincediseni imuli zonke ukuba zingafi ngendlala ikhona indla lonyaka asithandabuzi.”
Kusenjalo, izakhamizi zeDambashoko sezisungule uhlelo lokuzakhela ikilinika ukuze zithole ukwelatshwa eduzane.UMnu. Sikhululiwe Dube uthi okwamanje sebeyakhe ibhokisi kodwa babhekane lendubo ezithize.
“Kusese yimzamo yezakhamizi ukusebenza konke lapha kuhamba kancane abakhaya ababhadalwa kuyake kuthi kulemali sibathi mbinjana kodwa ngeke sithi bayabhadalwa yikho kuhamba kancane bakha kuphela ngoLwesithathu. Nxa singathola idonor abakhayo baphiwe imali singakha nsukuzonke.”
UMnu. Mbekezeli Ndlovu ohlala kulindawo uthi kubalulekile ukuthi likilinika yakhiwe ngokuphangisa.
“Ikilinika yeSilikwe ikhatshana, eyeStanmore ikhatshana, Gwanda kukhatshana so indlela zokuhamba zithwalisa abantu nzima so sizama ukuthi abantu bengabi lohlupho olukhulu nxa bephathekile basondele khonapha eduzane.”
Inengi lezakhamizi lihamba umango omude emaphandleni ukuyafinyelela ezempilakahle okudala ukuswelakala kwempilo kwesinye isikhathi.
Forum